Licho nie śpi (Perun)

Licho nie śpi signifas, ke diablo ne dormas kaj ĝi estas pola diraĵo signifanta, ke oni devas esti atentaj, ĉar ĉiam io povas okazi al vi. Ĝi estas ankaŭ nomo de biero el kontrakta bierfarejo Perun. Se Perun, do etikedo estas tre estetika kaj bela. Verŝita en pokalon, la biero estas evidente nigra. La ŝaŭmo belis, sed rapide malaperis. En aromo senteblas ĉefe brulita malto, iom da kafo aŭ ĉokolado. En gusto, krom tio, kio en aromo senteblas ankaŭ iom da fumiteco. Ĝi estas unue iom acida, poste amara, sed ne longe restanta. Gasenhavo estas malmulta, sed ja tio taŭgas por la stilo. La biero kostis 8,29 PLN (~2€), do sufiĉe multe, sed laŭ mi inde. La biero eble ne tute facilas, sed tamen trinkeblas sufiĉe facile kaj agrable. Tute gustuminda :)

Nomo Licho nie śpi
Stilo avena Stout (Oatmeal Stout)
Lando Pollando
Bierfarejo Perun www fb
Alkoholenhavo 5,4% volumene
Ekstrakto 13,0% peze
Temperaturo de servado 10 – 13°
Uzitaj maltoj pilzena, munkena, avenaj flokoj, ĉokolada 1200, brulita
Uzitaj lupoloj Iunga, Sybilla
Uzitaj gistoj S04
Aldonaĵoj
IBU mankas informo

PS. Pardonu fotokvaliton – ĉi-foje nur poŝtelefono.
PS2. Diablo fakte ne dormas. Dum farado de ĉi tiu priskribo, mi iom fuŝis priskribon de alia biero, kiun mi jam havis preparitan, sed ankoraŭ ne publikigitan, ĉar iel mi miksis dosierojn. Ĉu hazardo? ;)

Ĉu plaĉas al vi, kiel mi blogas pri bieroj? Aĉetu bieron por mi! :)

Advertisements

Mr. Hard (Pracownia Piwa)

Laste okazis Varsovia Bierfestiavlo kiun mi kompreneble vizitis. Tie por la unua fojo mi provis bieron en la stilo Barley Wine. Ĝi estis tre bongusta! Klare, trinkate en ne nepre la plej komfortaj kondiĉoj, ĉar en la festivalo kaj estis nur la unua provo, sed Barley Wine verŝajne havas grandan ŝancon aliĝi al miaj plej ŝatataj stiloj.

Kio estas Barley Wine? La nomo sugestas ligon kun vino kaj tio estas tute prava. Praulo de Barley Wine estas hordea vino produktata en antikva Grekio. La unua biero markita kiel Barley Wine estis Bass No. 1 Ale, produktita ĉirkaŭ 1870. Laŭguste Barley Wine estas ie meze inter vino kaj tradicia biero. Kutime ĝi enhavas multon da alkoholo (8-12%). Ĝi havas du ĉefajn substilojn: la britan kaj la usonan. En ambaŭ estas amareco, tamen pli intensa en la usonaj. La britaj variantoj estas pli maltaj kaj fruktaj.

Biero kiun mi provis nomiĝas Mr. Hard. Ĝi estas la unua Barley Wine produktita de la pola metieja bierfarejo (Pracownia Piwa). Ŝajnas, ke ĝi estas iu miksaĵo inter usona kaj brita versio, ĉar enhavas du lupolojn: usonan columbus kaj britan admiral. Ĝi estas ĉerizkolora kun blanka ŝaŭmo, kiu tamen rapide malaperis. Aromo estas malta, karamela kaj frukta. En la gusto unue venas dolĉo de la aromo kaj poste kompletigas ĝin delikata amareco de lupoloj. La biero estas densa, malmultgasa kaj brile balancita. En la festivalo, trionlitra glaseto kostis 15 zlotojn (3,50€), do nemalmulte, sed evidente indis. Se mi trovos ĝin, mi certe aĉetos plian.

Nomo Mr. Hard
Stilo Barley Wine
Lando Pollando
Bierfarejo Pracownia Piwa www fb
Alkoholenhavo 9,5% volumene
Ekstrakto 25,0% peze
Temperaturo de servado 10 – 13°
Uzitaj maltoj hordea, munkena, karamela
Uzitaj lupoloj columbus, admiral
Uzitaj gistoj mankas informo
Aldonaĵoj
IBU 67

PS. Pardonu fotokvaliton – ĉi-foje nur poŝtelefono kaj tro malgranda emblemo.

Ĉu plaĉas al vi, kiel mi blogas pri bieroj? Aĉetu bieron por mi! :)