ŻytoRillo (Pinta)

ŻytoRillo – la nomo estas kombinaĵo de la vorto żyto, kio en la pola signifas sekalon kun Amarillo, kiu estas nomo de usona lupolo. Tio jam diras sufiĉe multon pri la biero. Ĝi estas aŭtora variaĵo de la klasika sekala bierstilo – Roggenbier (hela, plena kaj malmulte lupolita), sed kun pli da maltoj (ankaŭ brulita) kaj multego da usona lupolo Amarillo.

Post verŝo en la glason tuje rimarkeblas vere elstara, etera, helbruna ŝauma ĉapo, kiu eltenas tre longe kaj dum drinkado lasas multajn spurojn. La biero estas tre malhelbruna, preskaŭ nigra. En aromo senteblas evidente citrusoj, sed ankaŭ bruliteco kaj iom da ĉokolado. ŻytoRillo estas densa kaj fortgusta kun longe restanta amareco, ne vere kontraŭita per alia gusto (povus esti ekzemple iom da citrusa dolĉo). Ĝi ne estas tute bone balancita, sed tamen tute bone gustas kaj agrable trinkeblas. Mi ie perdis kvitancon de la vendejo, sed miamore ĝi kostias 9 aŭ 10 zlotojn. Mi pensas, ke iam mi ankoraŭ retrinkos.

Nomo ŻytoRillo
Stilo Black Rye IPA (nigra sekala IPA)
Lando Pollando
Bierfarejo Pinta www fb
Alkoholenhavo 5,3% volumene
Ekstrakto 14,0% peze
Temperaturo de servado 9 – 11°
Uzitaj maltoj Weyermann®: pale ale, sekala, munketna tipo II, brulita Carafa® Special typ II
Uzitaj lupoloj Amarillo (usona)
Uzitaj gistoj Safale Fermentis S-04
Aldonaĵoj
IBU 68

Ĉu plaĉas al vi, kiel mi blogas pri bieroj? Aĉetu bieron por mi! :)

Dżin (Kraftwerk)

Aĉetitaĵo de la Varsovia Bierfestivalo – biero Dżin (ĝino) de la kontrakt abierfarejo Kraftwerk el Mikołów en Silezio, produktita en Wąsocz. Silezia karaktero tuj rimarkeblas en la tute bona etikedo. Stilo de Dzin estas India Pale Ale (IPA) kun Earl Grey kaj hibisko.

Verŝante en la glason mia unua penso estis, ke ĝi estas surprize multe gasenhava por ĉi tiu stilo, tamen trinkante tio ne ŝajnis ĝeni. Ŝaŭmo aperis rapide kaj eĉ pli rapide malaperis, lasante tamenn spurojn sur la vitro. Kiel atendite, la biero havas koloron de ne tre forta teo. Englase ĝi ŝajnas esti gluiĝema, sed enbuŝe tio ne multe senteblas.

Laŭetikeda Earl Grey troveblas nur iome en la aromo kaj eĉ tio eble ĉefe pro la memsugesto. Hibiskon mi ne sentis entute. Enestas tamen iom da malta, katamela aromo kaj iom da flora. La biero havas klaran, sed ne tre fortan amaran karakteron. Eble se ĝi estus unu el la unuaj IPA-bieroj, kiujn mi trinkus, mi estus verŝajne pli impresita. Tamen trinkine jam multajn tiajn ĝi ne aparte suirpizas, kvankam tute korektas. Kostis ne ege mule, ĉar nur 10 zlotojn en la festivalo kontraŭ duonlitra botelo. Sekvafoje havante tiom grandan elekton mi prefere prenu ion alian.

Nomo Dżin
Stilo India Pale Ale (IPA)
Lando Pollando
Bierfarejo Kraftwerk www fb
Alkoholenhavo 5,3% volumene
Ekstrakto 14,0% peze
Temperaturo de servado 10 – 13°
Uzitaj maltoj hordeaj kaj tritikaj
Uzitaj lupoloj Summit, Simco, Cascade
Uzitaj gistoj US-05
Aldonaĵoj teo Earl Grey, blanka teo, hibisko
IBU mankas informo

Ĉu plaĉas al vi, kiel mi blogas pri bieroj? Aĉetu bieron por mi! :)

Behemoth Profanum (Perun)

Ŝajne iĝis moda ke diversaj rokaj aŭ metalaj bandoj preparas sianomajn bierojn. Same estas en Pollando. Metala grupo Behemoth (jen ilia muziko: BEHEMOTH – Blow Your Trumpets Gabriel) havas eĉ tri tiajn bierojn: helan belgan IPA Sacrum, nigran IPA Profanum kaj usonan sukcenan elon Heretyk. Nun mi provas la duan.

Behemoth Profanum estis produktita de bierfarejo Perun kaj do ĝi kompreneble havas tre bonan etikedon – taŭgan por la nomo. La biero, kiel atendite estas komplete nigra, neniom travidebla. Ŝaŭmo unue altis kaj belis, sed rapide malaperis. Bedaŭrinde en aromo kaj gusto la biero ne plu tiom “nigras”. Senteblas ĉefe rezino kaj iom da fruktoj. Malpli multas tipe malhelbieraj: brulita kafo aŭ amara ĉokolado. Komence ĝi acidas kaj poste lasas amarecon. Mezgasa facile trinkeblas. Profanum estas interesa kaj agrabla, sed ne vere tion mi atendis de nigra biero de Behemoth kaj eĉ pli ne de nigra IPA – ĝis ĉi tiu stilo mankas al ĝi forto en la gusto. Eble oni pli bone kategoriigu ĝin kiel usonan stout – tiam ĝi tute bonas.

Nomo Behemoth Profanum
Stilo Black IPA / Cascadian Dark Ale / usona Stout
Lando Pollando
Bierfarejo Perun www fb
Alkoholenhavo 5,6% volumene
Ekstrakto 13,0% peze
Temperaturo de servado 10 – 13°
Uzitaj maltoj hordeaj, tritika
Uzitaj lupoloj lupoloj
Uzitaj gistoj mankas informo
Aldonaĵoj brulita hordeo
IBU mankas informo

Ĉu plaĉas al vi, kiel mi blogas pri bieroj? Aĉetu bieron por mi! :)

Kafirmacja (Birbant)

Jen nova stilo en mia kolekto – Saison. Saison estas somera biero kiu venas de Valonio. Originale ĝi estis preparata fine de vintra sezono por ke ĝi sufiĉu por varmaj monatoj. Ĝi devis esti sufiĉe forta por ke ĝi travivu varmajn monatojn, sed tamen malvarmiga kaj refreŝiga somere.

La biero nomiĝas Kafirmacja. Ĝi estis kreita danke al kunlaboro de kontrakta bierfarejo Birbant el Zielona Góra (la biero mem produktita en Zarzecze) kun trinkejo Konfirmacja el Katowice. Laŭ priskriboj de la etikedo, krom kutimaj ingidiencoj ĝi havas kelkajn aldonaĵojn – freŝan citronherbon, foliojn de Citrus hystrix kaj pipron. Verdire tiujn aldonaĵojn mi sentis nek en aromo, nek en gusto, sed el tiuj tri mi pensas, ke nur pipron mi vere kapablus rekoni. Aromo de la biero estas tre specifa kaj mi ne bone kapablas priskribi ĝin. Iom similas al odoro de tritikaj bieroj. Eble estas en ĝi iom tro maturaj mandarenoj? Vere ne kutima. En la gusto estas acida, poste alvenas delikata amareco. La biero enhavs multon da gaso kaj estas tre refreŝiga. Ŝaŭmo ne abundis kaj rapide malaperis, sed tio ne multe ĝenas. La biero estas malklara kaj havas helsukcenan koloron. Ĝenerale estas tre interesa kaj provinda, sed vere dependas de gusto ĉu oni ŝatos ĝin aŭ ne. Etikedon mi ne vere komprenas. Kiun rilaton al la biero havas tiu insekto?

Nomo Kafirmacja
Stilo Kaffir Saison
Lando Pollando
Bierfarejo Birbant www fb
Alkoholenhavo 6,5% volumene
Ekstrakto 15,5% peze
Temperaturo de servado 8 – 12°
Uzitaj maltoj pale ale, munkena, tritika
Uzitaj lupoloj Centennial, Citra, Mosaic, Marynka
Uzitaj gistoj WLP565
Aldonaĵoj freŝa citronherbo, folioj de Citrus hystrix, pipro
IBU mankas informo

Ĉu plaĉas al vi, kiel mi blogas pri bieroj? Aĉetu bieron por mi! :)

Miela Biero (Verdaj Skoltoj)

Jen finfine la unua en mia kolekto biero farita de Esperantistoj! Temas pri Miela Biero de Verdaj Skoltoj. Fakte mi estis tre bonŝanca, ĉar por KKPS 2015 en Heerlen (Nederlando) restis jam nur 10 lastaj boteloj (koran dankon al Meiyer, kiu sukcesis kapti unu por mi kaj porti Varsovien!). La antaŭajn eltrinkis plej verŝajne ne la Vardaj Skoltoj mem, ĉar ili nur produktas la bieron kaj ne rajtas trinki akoholaĵojn dum skoltaj eventoj. Feliĉe, kiel mi eksciis de Valère Doumont, oni planas refari la mielan bieron kaj ĝi devus esti preta en majo aŭ junio 2016. Eble do eĉ eblus venigi al IJK 2016 en Vroclavo? :)

Nun pri la biero mem. Unua surprizo estis la koloro. Je la unua verŝo la biero estis mielkolora, klara kaj iom travidebla, do tute kiel atendite. Je la dua verŝo ĝi tute ŝanĝiĝis – la biero estis malklara, tute netravidebla kaj havis karamelan koloron. Evidente oni povus tion facile eviti iom skuante la botelon antaŭ malfermo por suprenigi la falintajn mielerojn, sed ja kutime oni ne faras tion. Konsekvence, verŝante poduone la bieron kiu dum kelkaj tagoj atendis en fridujo, laŭkolore aspektis kvazaŭ du malsamaj bieroj. La ŝaŭmo en ambaŭ verŝoj ne abundis kaj rapide reduktiĝis al surfaca tavolo, kiu tamen bele ornamis la glason dum trinkado.

Dua surprizo estis la aromo. Krom tre delikata mielo, senteblis en ĝi alkoholeco. Eble ĝi pli fortas ol mielaj bieroj, kiujn mi kutime povas trovi en Pollando? Trinkante la bieron mi havis senton kvazaŭ mi trinkus tripel ale, do fortan fortan suprefermentitan bieron. Kiom fortas ĉi tiu biero – mi ne scias, ĉar tiu informo ne ĉeestas en la etikedo.

Tria surprizo estis la gusto. Konante mielajn bierojn haveblajn en Pollando mi atendis ion dolĉan, dum ĉi tiu estas acid-dolĉa. Ĉu la kaŝtan-mielo el Korsiko malpli dolĉas ol polaj mieloj aŭ ĉu ĝi estis aldonita malgrandkvante? Ankaŭ tion mi ne scias, sed ja volonte ekscios de la farintoj :) Amareco en la biero tute ne enestis, sed ja ĝin oni ne atendas de mielaj bieroj.

La biero haveblas en klasika por Belgio, trionlitra botelo, kiu en KKPS kostis ĉirkaŭ 3,25 eŭrojn. La etikedo estas klasika, modesta kaj evidente elstariganta mielecon de la biero. Bedaŭrinde apenaŭ haveblas inforomoj pri la biero mem, eĉ tiom bazaj kiel alkoholenhavo. Espereble sekvafoje oni aldonos ne nur tion, sed ankaŭ ionformojn interesajn por tiaj bierstranguloj kiel mi ;)

Resume, la biero estas interesa kaj por mi tre surpriza. Mi ne sciis kion atendi, ĉar informoj en etikedo mankis, do mi supozis ricevi ion similan al mielaj bieroj haveblaj en Pollando. Tia ĝi evidente ne estis – Miela Biero de Verdaj Skoltoj ŝajnas ests pli forta kaj malpli dolĉa ol mielaj bieroj, kiujn mi provis. Kun intereso mi reprovos la bieron kiam ĝi rehaveblos en 2016. Tamen antaŭ tio mi provos ankoraŭ brunan bieron de Verdaj Skoltoj, kiu jam estas ĉe mi, sed atendas maturiĝon. Ĝia gustumado estas planita por mezo de decembro. Sekvu la blogon por ne maltrafi! :)

Nomo Miela Biero
Stilo certe miela; mia diveno estas: miela belga forta Pale Ale
Lando Belgio
Bierfarejo Verdaj Skoltoj www fb
Alkoholenhavo mankas informo, sed mi supozas, ke evidente pli ol ĉe mielaj bieroj haveblaj en Pollando, kiuj kutime ne havas pli ol 6%
Ekstrakto mankas informo
Temperaturo de servado laŭ mi taŭgas 10°, kiel por belgaj fortaj eloj
Uzitaj maltoj mankas informo
Uzitaj lupoloj mankas informo
Uzitaj gistoj mankas informo
Aldonaĵoj kaŝtan-mielo el Korsiko
IBU mankas informo, sed certe tre malmulte

Ĉu plaĉas al vi, kiel mi blogas pri bieroj? Aĉetu bieron por mi! :)

Aktualigo la 20-an de decembro 2015

Laste mi ricevis de la bierfaristoj ligilon al la recepto de la biero, do jen aktualigoj por ĉi-supra tabelo:

Alkoholenhavo 6,37% volumene
Ekstrakto 16,1% peze
Uzitaj maltoj pilzena, horodeoj en flokoj, biskvita, karamela sukcena, acida
Uzitaj lupoloj East Kent Goldings, Northern Brewer
Uzitaj gistoj S-33, T-58
IBU 29
Recepto Blonde au miel

Irlandzki Ciemne (Krajan)

La hodiaŭa biero estas Irlandzki Ciemne de bierfarejo Krajan. Irlandzkie Ciemne, do irlanda malhela, sed kion fakte tio signifas? Unuavice mi pensus pri stout, sed ja ĝi ne estas stout – eble malhela lager kun karamelo. Ligo de ĉi tiu biero kun irlando restas por mi dubinda. Se legas tion iu irlandano, bv (mal)konfirmi, ĉu tiastila biero tipas vialande.

Verŝinte en la glason aperis alta, helbruna ŝaŭmo, sed ĝi rapide malaperis. La biero havas malhelrubenan koloron (en la fotoj povas aspekti kiel nigra, sed reale ne estas tia) kaj estas klara. Aromo apenaŭas, sed en gusto jam pli multo troveblas – ĉefe karamelo, eble ĉokolado, eble brulita panhaŭto. Ĝenerale la biero estas dolĉa, sed en neĝena kvanto. Mi pensas, ke tian bieron eblus fari pli bone – ĉefe se anstatŭ tiom da karamelo, ĝi ricevus pli da malhelaj maltoj. Tamen ja ĝi daŭre ne malbonas. Resume, leĝera iom dolĉa biero, kiu ne donos multajn aromajn aŭ gustajn impresojn, sed por simpla trinkado enordas. Prezo – 4,99 PLN (1,19€) en loka vendejo.

Nomo Irlandzke Ciemne
Stilo mankas informo, eble Dark Lager?
Lando Pollando
Bierfarejo Krajan www fb
Alkoholenhavo 6,0% volumene
Ekstrakto 14,0% peze
Temperaturo de servado eble bonus ĉirkaŭ 8 – 9°? ĝi ne aparte perdas ion, se estas malvarma
Uzitaj maltoj certe enestas hordeaj, aliaj ne menciatis
Uzitaj lupoloj mankas informo
Uzitaj gistoj mankas informo
Aldonaĵoj
IBU mankas informo

Ĉu plaĉas al vi, kiel mi blogas pri bieroj? Aĉetu bieron por mi! :)

Atak chmielu (Pinta)

Venas tempo por klasikaĵo – atak chmielu (lupola atako) de bierfarejo Pinta. Pri la stilo – usona India Pale Ale mi jam skribis ĉe Po Godzinach AIPA (Amber) do mi tuj iru al la biero. Ĝi estas mejloŝtono de la biera revolucio en Polland – produktata ekde 2011 kaj tiama biero de la jaro – en la pola merkato estis la unua tiom aroma kaj tiom amara.

La biero estas klara kaj kuprakolora. Eble en miaj fotoj la ŝaŭmo ne elstaras, sed kutime ĝi havas tre belan kaj stabilan ŝaŭmon. La aromo estas tre lupola, citrusa, eble iom flora. La biero estas evidente amara, sed laŭ mi tiu amareco estas tute agrabla, tre bone bilancita per dolĉa citruas aromo. Ĝi estas ankaŭ tre refreŝiga kaj surprize faciltrinkebla. Laŭ diversaj opinioj ĉi tiu biero ne havas tute stabilan kvaliton, sed mi ĝis nun ne trafis malbonan ekzempleron. En loka vendejo kostis 7,59 PLN (1,80€). Se vi ie vidos ĝin, certe provindas, ĉar bongustas kaj ja estas birrevolucia klaksikaĵo.

Nomo atak chmielu
Stilo American India Pale Ale (AIPA)
Lando Pollando
Bierfarejo Pinta www fb
Alkoholenhavo 6,15,0% volumene
Ekstrakto 15,1% peze
Temperaturo de servado 9 – 10°
Uzitaj maltoj pale ale, melanoidina, Carahell®, Carapils®
Uzitaj lupoloj Citra, Simcoe, Cascade, Amarillo
Uzitaj gistoj Safale US-05
Aldonaĵoj
IBU 58

Ĉu plaĉas al vi, kiel mi blogas pri bieroj? Aĉetu bieron por mi! :)

Hades (Olimp)

Hodiaŭ, la 5-an de novembro estas internacia tago de Stout-biero. Temas pri brita stilo de malhela suprefermentita biero, kiu devenas de Porter, sed kutime estas pli forta (nemalofte teman tiuj du stilnomoj estas uzataj alterne). Por celebri la tagon mi prezentas bieron en la stilo Russian Imperial Stout, do la plej forta varianto de Stout, kiu estis eksportata al Rusio.

Hades estas biero farita de la metieja bierfarejo olimp. Ĝi estas biero tute nigra kun bruna malalta ŝaŭmo. En aromo senteblas brulita karamelo kaj alkoholo. Gusto komence ripetas la aromon kaj ĝian dolĉon. Sekve venas amareco, kiu laŭdeklare estas tre forta. Ĝi ja klare senteblas, sed laŭ mi tute ne ĝenas. Cetere, en la listo de ingrediencoj troveblas pluraj kapsikoj. Ilin mi tute ne sentis – nek en aromo, nek en gusto.

Tio estis mia unua konfronto kun ĉi tiu stilo do mi ne bone sciis kion atendi. Unuagute mi ne tiom ŝatis la bieron, sed kun ĉiu pli guto mi ŝatis pli kaj pli. Estas tre interesa sitlo, ja proksima al mia tre ŝatata Baltic Porter. Mi certe plu provos ĝin. Ĉi tiun bieron mi taksas tute pozitive kaj certe povas rekomendi al ekspetimentuloj. Trionlitra botelo kostis 15 zlotojn (3,53€) en la Varsovia Beirfestivalo.

Nomo Hades
Stilo Russian Imperial Stout
Lando Pollando
Bierfarejo Olimp www fb
Alkoholenhavo 11,1% volumene
Ekstrakto 25,2% peze
Temperaturo de servado 10 – 13°
Uzitaj maltoj horodeaj: pale ale, pilzena, viena, karamela 600, ĉokolada hela, karamela 50, tritika, Cararoma®
Uzitaj lupoloj Zeus, Mozaic, Ahtanum, Fuggles, Experimental 366, Iunga
Uzitaj gistoj mankas informo
Aldonaĵoj brulita hordeo, pulva lakto, semoj de kakaoarbo, kapsikoj (Chipotle, Mulato, Aji Amarillo, Pasilla de Oaxaca, Habanero, Bird’s Eye)
IBU 66,6

Ĉu plaĉas al vi, kiel mi blogas pri bieroj? Aĉetu bieron por mi! :)

Permesilo Krea Komunaĵo La foto estas verko fare de Natalia Żebrowska kaj disponeblas laŭ la permesilo Krea Komunaĵo Atribuite-Samkondiĉe 4.0 Tutmonda.