Impresoj pri la 4-a Varsovia Bierfestivalo

Antaŭ kelkaj tagoj okazis la 4-a Varsovia Bierfestivalo. Ĝi daŭris dum 3 tagoj (7-9 de aprilo) kaj estis la dua, kiun mi partoprenis, sed fakte la antaŭan, okazintan antaŭ duona jaro mi ĉeestis nur dum kelkaj horoj, dum ĉi-jare mi ĉeestis ĉiutage. Kiel aspektas tia festivalo? Ĉi tiu okazis en stadiono de varsovia piedpilka klubo Legia. En du etaĝoj de la konstruaĵo sian lokon havis ĉirkaŭ 40 standoj de diversaj metiejaj bierfarejoj – ĉefe polaj, sed ankaŭ kelkaj eksterlandaj. En la ĉefa scenejo okazis iliaj prezentadoj kaj ankaŭ senpagaj prelegoj. En du aliaj ĉambroj okazis aparte pagendaj laborrenkontoj, prelegoj kaj gustumadoj. Alirebla estis ankaŭ triono de la spektantlokoj de la stadiono mem, kiuj apudis la “kongresejon” kaj ekstere estis manĝkamionoj. Ĉi tiu spaco, kiu pasintjare ankoraŭ tute bone sufiĉis, ĉi jare jam estis tute plenplene dum plej pintaj momentoj, do mi supozas ke sekvontfoje la festivalo okazos aliloke. Simpla enirbileto por la festivalo kostas 10 zlotojn (2,33 eŭrojn) kaj bileto por tuta festivalo 20 zlotojn (4,66€), do estas tre malmultekosta. Aperte pagendas iuj programeroj (laborrenkontoj, gustumadoj ktp.) kaj la prezoj varias inter 20 kaj 50 zlotoj. Kompreneble pagendas ankaŭ la bieroj mem. La prezoj estis ege variaj kaj ekzemplajn vi povos trovi en ĉi tiu artikolo. La festivalo havas sian dediĉitan aplikaĵon por poŝtelefonoj, kiu ege faciligas elektadon inter tiu kelkcento da bieroj.

Ĵaŭde mi venis nur por nelonge, por unu laborrenkontoj por komencantaj bierfaristoj kaj ĉeokaze mi provis nur unu bieron. Mi celis iun leĝeran bieron, kiun mi povis rapide aĉeti antaŭ la laborrenkonto, do kontrolinte en la aplikaĵo mi haste elektis Ice Cream Pale el la sveda bierfarejo Omnipollo. Nur ricevinte la bieron mi eksciis, ke ĝi fakte sufiĉe multe kostas – 25 zlotojn por trionlitro. La biero, kiu estis farita kun laktozo kaj vanilo evidentiĝis esti tre bongusta. La aromo kunigas lakto-vanilan glaciaĵecon kun ioma citrusa frukteco venanta de lupoloj. Gusto komence ripetas la aromon, sed la finaĵo estis jam milde amara. Ice Cream Pale etas vere agrabla, refreŝiga biero, kiun oni povus trinki per siteloj, se ĝi nur ne kostus tiom multe.

En du sekvaj tagoj mi povis ĉeesti la Festivalon jam pli longe, do ankaŭ biergustumado estis pli abunda. Mi komencis per Table Brett el bierfarejo Pinta. Temas pri Wild Ale lupoligita per usonaj Citra® kaj Centennial. Ĉi tiu helflava, malklaraŭ kaj ŝaŭm-abunda biero estas malforta (nur 3% da alkoholo kaj 9% da ekstrakto), leĝera kaj iom acida, tamen ne pro acidigaj bakterioj, sed pro tio ke ĝi estis fermentita per sovaĝaj gistoj. Fakte la elekto ne estis tute trafa se temas pri miaj gustopreferoj, sed estis interese konatiĝi kun la stilo. Bedaŭrinde, preninte trionlitron kontraŭ 9 zlotoj, meze de la glaso ĝi iĝis jam iom laciga por mi.

Sekva biero ŝajnas esti la malo de la antaŭa. Hey Now de Pracownia Piwa estas biero en la stilo wheat wine, do tritika ekvivalento de la stilo barley wine (en Esperanto respektive tritika vino kaj horodea vino). Ĝi estas flava kaj malklara kun ŝaŭmo aperanta nur forme de malalta surfaca tavolo kaj spuroj sur la glaso. Hey Now estas biero fortika, densa kaj gluiĝema. En aromo avanas malta dolĉeco, sed senteblas ankaŭ usonaj lupoloj. Gustas iom kiel likvoro, sed finiĝas per milda, iom restanta amareco. Kun 25% de malta ekstrakto kaj 10% de alkoholo ĝi evidente estas biero por longa kaj malrapida ĝuado. Tiel mi faris kun trionlitra glaso trinkita en la festivalo kontraŭ 18 zlotoj kaj iam poste mi ripetos kun la botelo aĉetita por preni hejmen (samgranda kaj sampreza).

Denove reveno al acida biero – tiaj estas nuntempe tre modaj. La biero Ryan Goseling estis farita en kunlaboro de bierfarejo Hopium kun hejma bierfaristo Janek Gadomski, kiu veniks en ilia hejmbiera konkurso. La stilo gose estis riĉigita je ĉerizoj kaj de ili venas roza koloro de ĉi tiu ne tute klara biero. En aromo senteblas dolĉa ĉerizeco, sed en gusto jam estas ĉefe acideco. Mi ne estas aparta ŝatanto de acidaj bieroj kaj ankaŭ ĉi tiu estis iom laciga por mi, do mi decidis rezigni jam pri acidaj bieroj dum la festivalo. Trionlitro kostis 7 zlotojn. La biero havas 14% de ekstrakto kaj 5,8% de alkoholo.

Venis tempo por la unua malhela biero. Mi elektis Katastorfa Double el Piwne Podziemie. La bieron Katastrofa (ne la duoblan) mi volis provi jam en la antaŭa eldono de la frestivalo, sed tiam ĝi elĉerpiĝis. Ĉi-foje mi sukcesis havi ĝian plifortigitan version kun 18% de ekstrakto kaj 7,4% de alkoholo. Ĝi estas nigra elo kun maltoj torfe fumigitaj (86%), aĝigita kun burbonigitaj lignaj flokoj. En aromo kaj gusto dominas bandaĝoj, asfalto, brulitaj kabloj. Vere. Certe estas interesa kaj provinda biero. Koloro estas tute nigra kaj ŝaŭmo apenaŭis, se iu interesiĝus.

Sekvaj du bieroj estis en mia lastatempe plej ŝatata stilo – barley wine. Babushka el dana bierfarejo To Øl estas ĝia angla versio, do tiu pli malte bazita. Ĝi estis preparita kune kun daktiloj kaj prunoj kaj maturigita en bareloj post vino Porto. Koloro estas ruĝa, ŝaŭmo apenaŭis. Aromo dolĉa, likvoreca kaj sama gusto kun kun rimarkebla daktileco. Senteblas ke ĝi fortas (13,5% de alkoholo), sed en neĝena maniero. Ĉi tiun gustumadon akompanis manĝo – baktia sala, fumigita montara ŝafromaĝo oscypek kun oksikoka marmelado kaj tio evidentiĝis esti tre bona kombino. La biero mem estas laŭ mi tute elstara, la plej bona, kiun mi trinkis en la festivalo. Tute indis pagi 18 zlotojn por du decilitroj. Se vi iam havus okazon provi – nepre ne maltrafu!

Usona versio de barley wine devas havi jam pli forte lupolan karakteron kaj tia estas Big Sleep el bierfarejo Raduga. Ĝi estas iom malpli fortika ol Babushka (ekstrakto: 24%, alkoholo: 10,5%), sed havas simile dolĉan aromon. Gusto pli forte iras en la direkton de amareco, kiu tamen estas milda kaj nerestanta. Ĝenerale tre bongusta kaj kompleta biero, kiu kostis 10 zlotojn por trionlitro.

De brita bierfarejo Siren mi gustumis bieron Caribbean Chocolate Cake, kiu estas Foreign Stout kun aldono de kakao, cipreso kaj laktozo. La biero estas tute nigra kaj havas belan brunan ŝaumon. En aromo avanis kakao kaj ĉokolado, poste aldoniĝis ioma bruliteco. En gusto, krom ripeto de aromo aperis ankaŭ ioma fumiteco. La biero estas tre densa kaj plenkorpa, kun alkoholenhavo je 7,4%. Du decilitroj kostis 14 zlotojn.

Plej multajn bierojn dum ĉi tiu festivalo mi aĉetis de bierfarejo Pracownia Piwa – jam menciitan tritikan vinon surloke kaj en botelo, jam konatan al mi horodean vinon Mr. Hard en botelo, same enbotele ĉi-festivalan novaĵon 500! kaj surloke specialan version de Dwa Smoki – usonstila tritika witbier. Speciala, ĉar maturigita en barelo post pola vodko starka. La bierfarejo havis nur lastajn 10 litrojn do oni rajtis aĉeti nur en dekonlitra porcio kontraŭ 10 zlotoj. La biero estas flava kaj iom malklara, kun longe restanta ŝaŭma ĉapo. En aromo ĉefrolas liĉio kaj helaj vinberoj. En gusto la biero estas milde amara kun ripeto de aromo, sed pli forte akĉentitaj vinberoj. Ĝi estas forte gasa leĝera biero (ekstrakto: 14%, alkoholo: 5,8%) tre taŭga por somero.

Sekva halto estis la stando de AleBrowar. Verdire tiam ĉe ili ne plu estis multa elekto kaj iom poste ili forvendis absolute ĉion el 1500 litroj da biero portitaj por la festivalo. Mi elektis Last Cut – usonecigitan belgan stilon golden ale kun 18% de ekstrakto kaj 7,1% de alkoholo. La biero estas rubenkolora kaj klara, kun ŝaŭmo en formo de tavolo. En aromo senteblas citrusoj kaj blankaj fruktoj. En gusto estis forta, sed ne restanta amareco. Priskribo de la biero menciis piron en aromo, sed ĝin mi ne sentis. Du decilitroj kostis 8 zlotojn.

Prsekaŭ je la fino estis ankoraŭ unu forta malhela biero RaISaRussian Imperial Stout el bierfarejo Maryensztadt, kiun mi havis okazon viziti. La biero kombinas belgajn gistojn, nederlandajn brulitajn maltojn kaj polajn lupolojn. Ĝi estas nigra kun bruna ŝauma tavolo. En aromo mi ĉefe sentis avenon. En gusto troveblas brulita kafo kaj brulitmalta amareco. Kvankam la biero tre fortas (ekstrakto: 22%, alkoholo: 9,4%), tio tute ne senteblas en gusto. Du decilitroj kostis 7 zlotojn.

Lasta biero, kiun mi gustumis en la festivalo estis Śrup z wuchtą pieprzu de SzałpiwCascadian Dark Ale kun pipro preparita speciale por ĉi tiu evento. Ĉi tiu biero aĉeteblis en eta, dekonlitra porcio kontraŭ 4 zlotoj. Gi estas bruna kaj iom travidebla kun nealta ŝaumo el kiu restas tavolo. Aromo estis intensa, sed mi ne kapablis difini ĝin. En gusto evidente: pipro, pipro kaj ankoraŭ pipro. Tre interesa kaj provinda. Kun 15% de ekstrakto kaj 6% de alkoholo ĝi estas ankaŭ sufiĉe facile trinkebla.

Tiel finiĝis la listo de bieroj provitaj en la festivalo. Kompreneble tiuj ne estis ĉiuj, kiujn mi volis provi, sed ne ĉiujn mi sukcesis ĉasi ĝustatempe. Feliĉe kelkajn provendajn mi povis aĉeti en boteloj por preni hejmen, ĉar ja simple ne eblas gustumi tiom grandan kvanton da bieroj en nur tri tagoj. Nun mi havas enŝranke sufiĉe abundan stokon da recenzotaj bieroj. Pri la festivalo mem mi pensas, ke ĝi estis vere bonega evento – grandan gratulon meritas la mazovia filio de la Pola Asocio de Hejmaj Bierfaristoj, kiu organizas ĝin. Ankaŭ mi ĝojas pri mia bierelektado – estis sufiĉe sukcesa. Sekva festivalo jam post duona jaro. Espereble ankaŭ tiam mi povos ĉeesti.

Advertisements

Duelo: American Barley Wine (Birbant vs. Faktoria)

Barley Wine apartenas al miaj plej ŝatataj stiloj, do tre volonte ĝian usonan version mi prezentos en ĉi tiu duelo de du bieroj. La stilo bedaŭrinde ne estas tre populara, do necesas iom ĉasi por trafi tian bieron. Des pli ĝojiga estas, ke mi sukcesis ĉasi du similajn en pli malpli sama tempo. Jen antaŭ vi: ABW de bierfarejo Birbant kaj Alcatraz el kontrakta bierfarejo Faktoria, kiu tiel debutas en mia blogo.

Signifajn diferencojn eblas trovi jam antaŭ malfermo de la botelo. Malsamas komencaj ekstraktoj: 24,5% ĉe ABW kaj 20,1% ĉe Alcatraz, malsamas uzitaj lupoloj, malsamas proponata temperaturo de servado (8 – 10° kaj 13 – 15°, mi trinkos eĉ pli varmajn). Samas stilo kaj deklarata amareco je 100 IBU, do el la supra limo por la stilo. Aspekte multe pli plaĉas al mi la etikedo de Birbant. Tiuj usonecaj de Faktoria, kun tromulto da teksto neniam aparte plaĉis al mi. Amuzas ankaŭ la nomo, ĉar ABW, krom esti mallongigo de American Barley Wine, en la pola estas ankaŭ mallongigo de Agentejo de Interna Sekureco al kio klare alludas la etikedo. Do, eble finfine ek al gustumado.

Ŝaŭmo en ambaŭ apenaŭas pro alkoholo tamen en ABW ĝi restis iomete pli longe. En ambaŭ bieroj gasenhavo estas malalta. Kolore ili tre diferencas: ABW estas flavsukcena dum Alcatraz estas ruĝbruna, iom kiel teo. Ambaŭ bieroj estas klaraj. En aromo de ABW avanas citrusoj, ĉefe grapofrukto, iomete ĉeestas floroj. Aromo de Alcatra estas dolĉa kaj likvoreca, senteblas buterkuketoj kun sukero, ankaŭ karamelo. En gusto de ABW estas dolĉa komenco kaj agrable amara finaĵo. Iom simile estas en Alcatraz, sed eble iomete pli acida komenco.

Ambaŭ estas tre densaj, gusto- kaj arom-plenaj. Ambaŭ tre bongustaj, tamen laŭ mi ABW ne estas tute en la stilo. Laŭ mi ĝi pli taŭgas por esti Imperial India Pale Ale (IIPA), do IPA kum pli forta malta bazo. Pro alta komenca ekstrakto ĝi estas pli ekvilibra ol IPA kutime (malta dolĉeco balancigas lupolan amarecon), sed daŭre ĝi arome pli taŭgas por IIPA. Alcatraz pli bone plenumas kriteriojn de la stilo American Barley Wine. Ambaŭ bieroj vere ege bonas kaj se vi trovus – nepre provu. Se mi povus aĉeti nur unu, mi elektus Alcatraz, sed vere ambaŭ tre bonas. Evidente estas bieroj por malrapida gustumado, por profunda ĝuado de ĉiu guto.

ABW

Nomo ABW
Stilo american barley wine
Lando Pollando
Bierfarejo Birbant www fb
Alkoholenhavo 10,5% volumene
Ekstrakto 24,5% peze
Temperaturo de servado 8 – 10°
Uzitaj maltoj pale ale
Uzitaj lupoloj magnum, zeus, simcoe, centennial, cascade, citra
Uzitaj gistoj US-05
Aldonaĵoj
IBU 100

Alcatraz

Nomo Alcatraz
Stilo american barley wine
Lando Pollando
Bierfarejo Faktoria fb
Alkoholenhavo 9,2% volumene
Ekstrakto 20,1% peze
Temperaturo de servado 13 – 15°
Uzitaj maltoj pilzena, pale ale, karamela
Uzitaj lupoloj columbus, cascade, chinook, motueka, palisade
Uzitaj gistoj US-05
Aldonaĵoj
IBU 100

Ĉu plaĉas al vi, kiel mi blogas pri bieroj? Aĉetu bieron por mi! :)

Stout kun flokoj de ĉerizo kaj piro tenitaj en viskio | Transfuzja (Hopkins)

Ĉi-foje koncize pri Transfuzja – biero en la stilo Foreign Extra Stout (FES) el bierfarejo Hopkins. La biero estas tute nigra. Bela bruna ĉapo de ŝaŭmo ne restis tre longe, sed lasis maldikan tavolon ĝis fino de la gustumoado. En aromo unue senteblas dolĉa frukteco – eble ĉeriza, sed piran mi ne sentis – sekve iom da amara ĉokolado kaj fine brulita haŭto de nigra pano. En la gusto ne plu estas dolĉe. Ioma acideco rapide lasas spacon al ne ege forta, sed iom restanta kaj iom viskieca amareco venanta evidente de brulitaj maltoj. Jen interesa biero, kiu kostis 10 zlotojn (~2,30€).

Nomo Transfuzja
Stilo Foreign Extra Stout (FES)
Lando Pollando
Bierfarejo Hopkins www fb
Alkoholenhavo 7,2% volumene
Ekstrakto 17,0% peze
Temperaturo de servado 12 – 16°
Uzitaj maltoj pale ale, munkena, avenflokoj, brulita horedo, tritika, ĉokolada hela, caraspecial I
Uzitaj lupoloj challenger, EKG
Uzitaj gistoj S-04
Aldonaĵoj flokoj de ĉerizo kaj piro tenitaj en viskio
IBU 40

Ĉu plaĉas al vi, kiel mi blogas pri bieroj? Aĉetu bieron por mi! :)

Rekte el fermentujo | Sweet Sixteen (Maryensztadt)

De la ekskurso al bierfarejo Maryensztadt mi alportis kelkajn bierojn por provi kaj recenzi. Unu el ili estas milk stout (nomata ankaŭ sweet stout), kiun mi provis ankaŭ en la bierfarejo rekte de fermentujo. Grafika koncepto de la bierfarejo estas tia, ke ĉiu ilia biero estas kvazaŭ iu loko en la urbo kaj sweet sixteen estas glaciaĵoj (ĉar ja estas biero kun laktozo). Ĝia nomo alludas dolĉetecon kaj 16 elcentojn da komenca ekstrakto. Rimarkindas ankaŭ ke la bierfarejo Maryensztadt aparte zorgas pri parigado de bieroj kun manĝoj (ja ili planas havi restoracion en Varsovio) kaj ĉi tiun bieron oni rekomendas kun ĉokolado, glaciaĵoj, bovaĵa gulaŝo, fromaĝoj, forte rostitaj manĝoj kaj fumigitaj ŝinkoj. Kun tiom da informoj eblas jam iom antaŭsupozi pri kia biero temos. Kaj kia ĝi estas?

En aromo senteblas ĉefe grena kafo delikate akompanata de cappuccino kaj amara ĉokolado. En gusto kombinitas milda dolĉeco venanta de laktozo kun milda amareco, tamen ne lupola, sed venanta de brulitaj maltoj. Enestas ankaŭ iometa cideco. La biero estas tre glata kaj kremeca, bele gluiĝanta al la glaso. Ĉi tiu eco venas de aldonitaj avenflokoj. Aspekte estas tre bela – tre malhelbruna, preskaŭ nigra kun helbruna ŝaŭmo. Mi persone tre ŝatas la stilon milk stout kaj ĉi tiu estas vere bona kaj agrabla ekzemplo. Mi forte rekomendas!

Nomo Sweet Sixteen
Stilo Milk Stout
Lando Pollando
Bierfarejo Maryensztadt fb
Alkoholenhavo 6,0% volumene
Ekstrakto 16,0% peze
Temperaturo de servado 8 – 12°
Uzitaj maltoj hordeaj kaj tritikaj
Uzitaj lupoloj mankas informo
Uzitaj gistoj mankas informo
Aldonaĵoj avenflokoj, lakto
IBU mankas informo

Ĉu plaĉas al vi, kiel mi blogas pri bieroj? Aĉetu bieron por mi! :)

Ekskurso: bierfarejo Maryensztadt

Antaŭ kelkaj tagoj mi partoprenis ekskurson organizitan de la Pola Asocio de Hejmaj Bierfaristoj (PSPD) dum kiu ni vizitis du bierfarejojn: konzernan Warka en Warka kaj metiejan Maryensztadt en Zwoleń. Unue mi ŝatus rakonti pri la dua :)

Maryensztadt estas nova bierfarejo, kiu kreiĝis en la lastaj monatoj. La posedantoj planis malfermi ĝin en Varsovio en ĉirkaŭaĵo Mariensztat, sed tio evidentiĝis ne tuj farebla pro burokratiaj kialoj. Por ne atendi unu jaron ili decidis tuj krei la bierfarejon aliloke — en Zwoleń, ĉirkaŭ 100 kilometrojn sude de Varsovio. En la planita loko en Varsovio poste malfermiĝos restoracio apartenanta al la bierfarejo.

La bierfarejon montris al ni Jakub Piesio, ĉefa bierfaristo de Maryensztadt. La koro de la farejo konsistas el dekoktujo kaj filtrujo, kiuj povas prilabori 1100 litojn (11 hl). Sekve la dekoktaĵo fluas al unu el 12 fermentujoj kun kapacito de 20 hektolitroj, kie la biero fermentas kaj maturiĝas. Rekte el tiuj fermentujoj ni havis okazon provi tri bonngustajn bierojn: Sweet Sixteen en la stilo milk stout, pollupolan helan elon — Polish Hop(e) kaj pilsan — Czeska 11. La unuan el ili mi aĉetis ankaŭ enbotele, do poste mi skribos pri ĝi pli detale. Mi aĉetis ankaŭ sekalan Mi to żyto kaj helan belgstilan Belgijska Blondynka, do verŝajne ankaŭ tiuj ricevos miajn recenzojn. Konante tiujn tri jam provitajn, mi tre antaŭĝojas tiujn gustumadojn. Kaj por la fino ankoraŭ kelkaj fotoj de la bierfarejo Maryensztadt en Zwoleń.

Kun fianĉino en Lublino | Hard Bride (AleBrowar)

Sabate mi havis okazon viziti urbon Lublin en orienta Pollando. La urbo vizitnidas kaj la ekskurso tre ĉarmis do mi certe bladaŭ revenos tien. Des pli ke mi jam konas tre bonan veg(etar)an lokon por manĝi – restoriacion Zielony Talerzyk. Mi manĝis tie rositatjn legomojn kun humuso kaj por deserto zingibran kukon. Ambaŭ manĝoj tre bongustis, laborantaj tie homoj estis tre agrablaj, nur prezoj estis pli “varsoviaj” al “lublinaj”, sed malgraŭ tio, vizitante Lublinon denove mi certe revenos al ĉi tiu maĝejo. Sed ja, mi blogo estas pri bieroj, do kion mi trinkis?

Hard Bride (Forta Fianĉino) el kontrakta bierfarejo AleBrowar apartenas al stilo American Barley Wine. Tiaj bieroj kutime estas fortaj, aromplenaj kaj gustoplenaj, do ekzakte tiaj kiajn mi ŝatas. Trinkaĵo en la glaso estas klara kaj melhelsukcena. Ŝaŭmo malaltis kaj ne ĉeestis tre longe. En aromo senteblas vere multego – malta dolĉeco, fruktoj – ĉefe grapfrukto kaj mangifero. Gusto estas tre bone balancita – fortan maltan dolĉecon kontraŭas eĉ pli forta lupola amareco. Estas usona versio de Barley Wine, do la lasta akĉento estas evidente je amareco kiu iom restas. Malgraŭ preskaŭ 10% da alkoholo ĝi tute neniom senteblas. La biero estas densa kaj glata kun tre malmulta gaso, vere bongusta, taŭga por malhasta gustumado. Mi tre ŝatis ĝin kaj forte rekomendas!

Nomo Hard Bride
Stilo American Barley Wine
Lando Pollando
Bierfarejo AleBrowar www fb
Alkoholenhavo 9,8% volumene
Ekstrakto 24,0% peze
Temperaturo de servado 10 – 13°
Uzitaj maltoj pale ale, tritika, Carapils, Caramunich, acidiga
Uzitaj lupoloj simcoe, mosaic, chinook
Uzitaj gistoj Safale US-05
Aldonaĵoj
IBU 110

Ĉu plaĉas al vi, kiel mi blogas pri bieroj? Aĉetu bieron por mi! :)

Biernomo malpermesita en Britio | Milk Stout (Jakub Murlikiewicz kaj Bartek Lachowski-Koniecpolski)

Milk Stout (Lakta Stout) estas tre agrabla stilo venanta de Britio. Ĝia nomo venas de laktozo (lakta sukero), kiun oni aldonas al ĝi. Laktozo ne estas fermentata fare de gistoj kaj ne ŝanĝiĝas en alkoholon. Ĝi restas en la biero kiel sukero kaj tiel donas al ĝi dolĉecon kaj specifan kremecan aromon. Foje sur etikedoj de tiustilaj bieroj aperadis lakto aŭ similaj produktoj. Tiel estis interalie en klasikaĵo – Mackeson’s. Post la Dua Mondmilito ĉi tiu biero estis opiniata kiel tre valora por patrinoj mamnutrantaj siajn bebojn. Poste la nomo Milk Stout estis malpermesita en Britio por ne sugesti ke biero estas saniga, do anstataŭe ĝi estas tie nomata Sweet Stout (Dolĉa Stout).

En hejma bierfarejo en Oława tiustilan bieron preparis Jakub Murlikiewicz kaj Bartek Lachowski-Koniecpolski (siatempe mi jam recenzis ilian tritikan bieron). En ĝia aromo ĉefrolas brulitaj grenoj, ĉeestas ankaŭ kremeca amra ĉokolado kaj iometa karamelo. Gusto ripetas la aromon, estas acid-dolĉa kun apenaŭa amareco nur en la fino. La biero estas tre agrabla en trinkado – glata kaj kremeca, malgraŭ ke gasenhavo en ĝi estas relative alta (por tiu stilo). Aspekte ĝi prezentiĝas bele – estas nigra, malhelbruna ĉe randoj kun alta, sed nelongrestanta ŝaŭmo. Trinki la bieron estis tre plezure. Mi jam antaŭĝojas martan viziton en Vroclavo dum kiu mi espereble povos gustumi iliajn sekvajn bierojn.

Nomo
Stilo Milk Stout / Sweet Stout
Lando Pollando
Bierfarejo Jakub Murlikiewicz kaj Bartek Lachowski-Koniecpolski
Alkoholenhavo mankas informo
Ekstrakto mankas informo
Temperaturo de servado 10 – 13°
Uzitaj maltoj pale ale, tritika, karamela hela, avenflokoj, koloriga, brulita horodeo
Uzitaj lupoloj Marynka, Lubelski
Uzitaj gistoj Safale S-04
Aldonaĵoj laktozo
IBU mankas informo

Ĉu plaĉas al vi, kiel mi blogas pri bieroj? Aĉetu bieron por mi! :)

La plej forta balta porter | Imperium Prunum (Kormoran)

Ĉi tiun bieron oni ege atendis en la pola mondeto de bierŝatantoj. Imperium Prunum de bierfarejo Kormoran el Olsztyn apartenas al la polej bona pola stilo – balta porter. Fakte ĝi estas ĝia imperia (duobla) versio, ĉar kutime ili havas 18-22% da ekstrakto kaj 8-10% sa alkoholo. Imperium Prunum havas 26% da ekstrakto kaj 11% da alkoholo, do en ambaŭ kriterioj ĝi estas evidente la plej forta balta porter ĝis nun farita en Pollando. La biero estis produktita el horodeaj maltoj kun aldono de loka specialaĵo – suska sechlońska, kiu estas fumigita, sekigita pruno.

La bierfarejo vere elstare prepariĝis por la eldono. Entrinkeja premiero okazis dum la tago de balta porter. Kelkajn tagoj poste vendejojn atingis bonege preparita botela versio. Ĉi botelo estas pakita en apartan skatolon. La botelo mem estas satenigita nigre kaj sekurigita per sigelvakso, kio helpas plumaturigi la bieron (kvankam jam aĉetante la bieron oni ricevis trinkaĵon maturigitan dum unu jaro). Anstataŭ etikedo, la informoj estas printitaj rekte sur la botelo. Malgraŭ sufiĉe alta prezo (25 zlotoj, do 5,60€) mendoj por ĝi tiom multis, ke pluraj vendejoj vendis nur po unu botelo al homo. Evidente oni havas impreson, ke temas pri biero nekutima – kaj efektive tia ĝi estas.

La biero estas nigra, netravidebla kun iometaj rubenaj briloj ĉe rando de la glaso. Ŝaŭmo apenaŭ aperis, kio ne tre surprizas en tiom forta biero (tamen laŭ recenzoj, en trinkeja versio ŝaŭmo tre abundis). En aromo unue senteblas delikata dolĉa, frukteca fumo, poste venas odoro de brulita grena kafo kaj brulitaj maltoj. Gusto ripetas la aromon – unue estas dolĉo, poste delikata amareco, aldoniĝas ankaŭ ioma amara ĉokoladeco. Gaso ne multas kaj agrable delikatas. La biero ege glata, densa kaj gluiĝema. Iom skuante la glason oni povas vidi kiom ĝi bele restas sur la vitro. Surlange ĝi estas velura, eĉ oleeca. Rimarkindas, ke nek en aromo, nek en gusto oni sentas alkoholon, dum ĝi ja tre multas. Alkoholon oni sentas nur ene en gorĝo, engutinte la bieron kiu tre agrable varmigas. Ĉio en la biero estas vere elstare balancita, kio certe ŝuldiĝas al ĝia longa, unujara maturiĝado. Ĉi tiun bieron oni povas vere ĝui guton post guto kaj tre bldaŭ bedaŭri ke ĝi jam finiĝis. Ankaŭ mia botelo, trinkita kune kun mia fratino, finiĝis tro rapide. Bonŝance mi sukcesis aĉeti du tiajn botelojn, do la dua restos por ankoraŭ pli maturiĝi kaj mi malfermos ĝin ĉe iu speciala okazo.

Nomo Imperium Prunum
Stilo imperia balta porter
Lando Pollando
Bierfarejo Kormoran www fb
Alkoholenhavo 11,0% volumene
Ekstrakto 26,0% peze
Temperaturo de servado 16 – 18°
Uzitaj maltoj horodeaj
Uzitaj lupoloj mankas informo
Uzitaj gistoj mankas informo
Aldonaĵoj fumigita, sekigita pruno: suska sechlońska
IBU mankas informo

Ĉu plaĉas al vi, kiel mi blogas pri bieroj? Aĉetu bieron por mi! :)

Varmiga balta porter kun kapsiketo | Grand Imperial Porter Chili (Amber)

Ĉi tiu eleganta botelo estas Grand Imperial Porter Chili – tre interesa variaĵo de la stilo balta porter. Kiel la nomo de la biero sugestas, ĝi havas aldonaĵon de ĉili-kapsiketoj. Tiuj ne influas la aspekton, kiu estas taxuga por la stilo. La biero estas malhelbruna kaj klara. Ŝaŭmo de ĝi ne tro altis kaj ne restis longe. En aromo senteblas ĉefe ĉokolado, karamelo kaj ioma alkoholeco. En gusto unue venas ĉokolada dolĉo, sekvata per delikata amareco. Ĉio finiĝas per longrestanta ĉili-kapsiketa spiceco. La biero evidente pikas langon, tamen ne per gaso, sed per kaspiketa spiceco. La biero estas varmiga, perfekta por vintraj vesperoj. Mi provis ĝin jam kelkfoje (ĝi estas relative ofte trovebla en vendejoj) kaj ĉiam tre ŝatis.

Nomo Grand Imperial Porter Chili
Stilo balta porter / baltic porter
Lando Pollando
Bierfarejo Amber www fb
Alkoholenhavo 8,0% volumene
Ekstrakto 18,1% peze
Temperaturo de servado 13 – 18°
Uzitaj maltoj horodeaj helaj kaj malhelaj
Uzitaj lupoloj lupoloj
Uzitaj gistoj mankas informo
Aldonaĵoj natura aromo de ĉili-kapsiketo
IBU mankas informo

Ĉu plaĉas al vi, kiel mi blogas pri bieroj? Aĉetu bieron por mi! :)

Oranĝoj, framboj, mielo | Ju-Rajska Pomarańcza (Na Jurze)

Jen io por ŝatantoj de bieroj dolĉaj kaj fruktaj. Ju-Rajska Pomarańcza el bierfarejo Na Jurze jam per nomo kaj per bela etikedo sugestas ke temos pri organĝeca biero. Verŝita en la glason ĝi malklaras kaj havas koloron similan al ruĝa grapfrukto. Ŝaŭmo ĉe mi apenaŭ aperis, sed eble estas pro mia tro delikata verŝado. Normale en tritika biero, ĝi devus esti multe pli kvalita. En aromo sententeblas framboj kaj citruseco de oranĝoj. En gusto unue senteblas dolĉeco kaj mielo, sekve ripetiĝas oranĝoj kaj framboj de la aromo, fine alvenas ioma acideco. Amareco tute ne senteblas, sed ja temas pri tritika biero, do ĝin oni ne vere atendas, kvankam ioma ne ĝenus por balancigi dolĉecon.

Koncepto de la biero estas tre interesa, kvankam mi pli ŝatas, kiam fruktaj gustoj venas pli naturmetode ol per aldono de sirupo (ĉi-kaze framba). Agrablas lupoldevena citrusa aromo, tamen ne ĝenus iom pli lupoligi la bieron je amareco por bilancigi mielan dolĉecon. Malgraŭ tio la biero estas provinda kaj certe ŝatos ĝin tiuj, kiuj kutimas mendi bieron kun aldono de suko.

Nomo Ju-Rajska Pomarańcza
Stilo tritika
Lando Pollando
Bierfarejo Na Jurze www fb
Alkoholenhavo 4,7% volumene
Ekstrakto 16,5% peze
Temperaturo de servado 7 – 11°
Uzitaj maltoj pilzena, tritika
Uzitaj lupoloj Marynka, Citra, Amarillo
Uzitaj gistoj S33
Aldonaĵoj ŝelo de organĝo, mielo, oranĝa oleo, framba sirupo, citronacido
IBU mankas informo

Ĉu plaĉas al vi, kiel mi blogas pri bieroj? Aĉetu bieron por mi! :)