Duelo: balta porter (Kormoran vs. Fortuna)

Hodiaŭ, la 16-an de januaro estas tago de Balta Porter, do jen bona okazaĵo por eki novan serion – dueloj. Temas pri blogaĵoj en kiuj mi komparos du (aŭ pliajn) bierojn de la sama stilo. Balta Porter estas aparte bona por komenci ankaŭ pro aliaj kialoj. Unue, ĝi estas unu el trezoroj de Pollando – stilo specifa por ĉi tiu mondparto. En Pollando vere malfacilas trovi malbonan Baltan Porter, ĉar eĉ konzernaj bierfarejoj, kiel Żywiec aŭ Okocim, kiuj kutime faras ne tro kvalitan bieron, kiam temas pri Balta Porter, ili atingas sian pinton. Due ĝi fakte estas la stilo danke al kiu mi komprenis, ke biero povas bongusti. Ja siatempe mi trinkadis simplan bieron kun gekologeoj kaj tiam ŝajnis al mi ke ĉiuj beroj pli malpli samas kaj ne tro bongustas. Fine, nun Balta Porter estas unu el miaj ege plej ŝatataj bierstiloj.

Kiel kreiĝis ĉi tiu bierstilo? Ĝi baze devenas de brita stilo Porer – malhela biero por havenanlaboristoj. El ĝi evoluis iom pli forta bierostilo unue nomatan Stour Porter (stout malnovangle signifas forta), kiu poste fariĝis aparta stilo Stout. Similan bieron oni eksportis al Baltmara regiono kaj al cara Rusio, sed pro bezonoj de la loka merkato (kaj pro neceso pli konservigi la bieron) oni faris ankoraŭ pli fortan varianton nomatan (Russian) Imperial Stout (en ĉi tiu stilo mi recenzis bieron Hades el bierfarejo Olimp). Komence de la 19-a jarcento, dum la Napoleonaj Militoj oni malpermesis importon de Anglio, do en nia regiono ekmankis forta, varmiga biero por vintra sezono kaj konsekvence necesis trovi metodon por produkti similan bieron. Intertempe populariĝis metodoj de suba fermentado, do la nove produktatan bieron oni faris tiamaniere (male ol suprefermentatajn Porter kaj Stout. Pro tio, ke ĝi estas farata ĉefe en la landoj situitaj apud Balta Maro, ĝi ricevis nomon Balta Porter.

Por la duelo mi elektis du bierojn: Porter Warmiński de bierfarejo Kormoran el Olsztyn kaj Komes Porter Bałtycki de bierfarejo Fortuna el Miłosław. Kial tiuj du? Ili havas tre similajn ecojn – ambaŭ havas 9 elcentojn de alkoholo kaj 21 elcentojn de ekstrakto. Amabaŭ estas sufiĉe vaste haveblaj – ankaŭ en tute normalaj, nespecialistaj vendejoj. Tie, kie mi aĉetis ilin Kormoran kostis 7,70 zlotojn (1,72€) kaj Komes – 6,50 zlotojn (1,45€). Fine, ambaŭ estas internacie premiitaj. En la prestiĝa Eŭropa konkurso European Beer Star en la kategorio de Baltaj Porteroj la biero de Kormoran veniks en 2012 kaj tiu de Komes en 2013.

Ambaŭ bieroj havas trankvilan kaj estetikan etikedon – tute taŭgan por la stilo. Verŝinte en la glason ambaŭ estas malhelbrunaj, klaraj kaj netravideblaj. Ŝaŭmo de Kormoran estis malhelbruna, mezalta kaj ne tro longa. Ĉe Komes ŝaŭmo estis bruna, do iom malpli hela, ankaŭ mezalta, sed ĝi restis pli longe, poste reduktiĝinte al tavolo kaj fine lasinte ringon ĝis fino de la gustumado. Ambaŭ bieroj estas pezaj, densaj, glataj kaj esencaj. Ĉe Kormoran la biero videble gluiĝas al la glaso. Ĉe Komes glason ornamas ŝaŭmo. Flarante la bierojn, en aromo de Kormoran senteblas ĉefe brulita kafo kaj ioma acideco. Aromo de Komes estas pli bunta: eblas trovi en ĝi karamelon, kafon kaj kremon, kiuj sume donas impreson de aromo simila al karameldolĉa cappuccino. Aldone senteblas io, kio por mi similas al ĉokoladetoj kun ĉerizo en likvoro ene. En gusto Kormoran ripetas la aromon al kiu aldoniĝas ioma amareco, ioma viskieco, tamen daŭre alkoholo ne estas sentebla en la gusto. Komes ankaŭ en sia gusto unue ripetas la aromon. Krome en ĝi estas pli da dolĉeco ol amareco. La biero estas iom likvoreca kun nur fine venanta ioma amareco. Ĝenerale laŭ mi ambaŭ bieroj estas tre sukcesaj. Kormoran estas iom pli amareca. Komes – pli aroma kaj pli dolĉeca. Mi persone preferas la duan, sed ja gustoj malsamas, do elektu laŭplaĉe. Se vi iam renkontos ilin, mi forte rekomendas aĉeti. Fakte estante en Pollando oni povas sekure aĉeti kun ajn bieron en la stilo Balta Porter. Mi ankoraŭ ne trafis malbonan kaj samon deziras al vi, hodiaŭ en la tago de Balta Porter!

Porter Warmiński

Nomo Porter Warmiński
Stilo balta porter
Lando Pollando
Bierfarejo Kormoran www fb
Alkoholenhavo 9,0% volumene
Ekstrakto 21,0% peze
Temperaturo de servado 10 – 12°
Uzitaj maltoj horodeaj: pilzena, karamela, brulita
Uzitaj lupoloj mankas informo
Uzitaj gistoj mankas informo
Aldonaĵoj
IBU mankas informo

Komes Porter Bałtycki

Nomo Komes Porter Bałtycki
Stilo balta porter
Lando Pollando
Bierfarejo Fortuna www fb
Alkoholenhavo 9,0% volumene
Ekstrakto 21,0% peze
Temperaturo de servado 10 – 12°
Uzitaj maltoj horodea hela, karamela
Uzitaj lupoloj mankas informo
Uzitaj gistoj mankas informo
Aldonaĵoj
IBU mankas informo

Ĉu plaĉas al vi, kiel mi blogas pri bieroj? Aĉetu bieron por mi! :)

Advertisements

Kio estas IBU? | imperium atakuje (Pinta)

Ĉi tiu sperto devus esti ŝoka. Mi trinkas bieron kiu amaras je 81 aŭ 87 IBU. Kio estas IBU? IBU, do International Bittering Units (Internaciaj Amarec-Unuoj) estas mezurilo de bieramareco. Kutime trinkataj en Eŭropo konzernaj lager-bieroj havas amarecon de proksimume 16-24 IBU. Ekzemploj? Żubr havas 16 IBU, Perła Export (mi memorigas, ke export sugestas plian kvanton da lupolo, do plian amarecon) – 17, Carlsberg kaj Lech – 18, Tyskie kaj Heineken – 20 kaj finfine, laŭ multaj opiniata “amara” Żywiec – 24 IBU. Tiuj estas kvantoj ege malaltaj, taŭgaj por lager bieroj (devus havi inter 16 kaj 25 IBU), sed eĉ ne atingantaj normojn por Pilsner, kiu devus havi inter 25 kaj 50 IBU. Por trovi veran amarecon oni evidente devas serĉi inter metiejaj bieroj.

La biero, kiun mi nun trinkas – imperium atakuje (imperio atakas) de bierfarejo Pinta – laŭetikede havas 81 IBU kaj laŭteste eĉ 87 IBU, do ĝi devus esti ekstereme amara. Ja ĝi estas Imperial India Pale Ale, do IPA kun ankoraŭ pli da lupolo. Sed fakte por mi ĉi tiu biero ne vere estas tiomege amara. Aŭ pli precize, ĝi estas amara, sed tiu amaraeco tute ne ĝenas kaj tio iom surprizas min, ĉar siatempe mi ne bone toleris tre amarajn bierojn. Do, aŭ mia toleremo ja amareco signife ŝanĝiĝis pro miaj lastatempaj biereksperimentoj aŭ ĉi tiu biero estas tiom bone balancita. Fakte, ja tiuj IBU-gradoj ne estas ĉio se temas pri senteblo de amareco – tre gravas ankaŭ rilato inter IBU kaj ekstrakto, sed ja ankaŭ en tiu eco imperium atakuje estas sufiĉe eksterma (kvankam ne plej eksterema el la polaj bieroj).

Ĵus venis Natalia, provis ĝin kaj ankaŭ ŝi ne sentas tiun amarecon kiel ĝenan, sed opinias la bieron bongusta, do ŝajnas ke ĝi vere estas mirinde bone balancia. Pri la cetero kurte. Ŝaŭmo ne multis ĉe mi, sed mi ne aparte zorgis. Koloro sukcena, klara. Aromo evidente fortas, ĉar ja estas multego da lupolo. Ĝi kostis 9,29 PLN (2,20€) en vendejo, do ja multe, sed tute indis. Fakte mi eĉ bedaŭras, ke jam la vendejo fermitas kaj mi ne povas iri aĉeti plian. Impreium atakuje de Pinta estas vere bonega plena gusto kun perfekte balancita amareco. Simple tiu biero nepre provendas.

Nomo imperium atakuje
Stilo Imperial India Pale Ale (Imperial IPA)
Lando Pollando
Bierfarejo Pinta www fb
Alkoholenhavo 7,8% volumene
Ekstrakto 19,1% peze
Temperaturo de servado 11 – 12°
Uzitaj maltoj Weyermann®: pale ale, hordea enzimaktiva, melanoidina, Carared®, Carapils®
Uzitaj lupoloj usonaj: Zeus/Columbus, Chinook, Centennial, Citra®, Cascade, Palisade®
Uzitaj gistoj Safale US-05
Aldonaĵoj
IBU 81-87

Ĉu plaĉas al vi, kiel mi blogas pri bieroj? Aĉetu bieron por mi! :)

Berlinstila acidaĵo | Kwas Delta (Pinta)

Jen interesa aŭtora interpreto de biera stilo Berliner Weisse, do Berlina Tritika. Ĉi tiu stilo estas loka specialaĵo de Berlino. Temas pri tre acida tritika biero kun malmulta komenca ekstrakto (kutime 7–8%), ofte servata kun sukersiropo aŭ framboj aŭ eĉ miksata kun pilsa biero por mildigi acidecon. Foje ĝi estas opiniata kiel la plej refreŝiga biero en la mondo.

La bieron Kwas Delta preparitan speciale por la 3-a Beer Geek Madness en Vroclaco, bierfarejo Pinta kategoriigas kiel Berliner Schwarze (Berlina Nigra), do kiel nigran version de Berliner Weisse. Nigran, sed nur en koloro. Iom kurioze, ĉi tiu biero daŭre gustas kiel hela, ĉar kolorigan maltan ekstrakton Sinamar oni uzis nur por ricevi ĉi tiun aspekton. En aromo senteblas malmulto, eble nur iometa fumiteco. En gusto citroneca acideco tiom fortas, ke malfacilas sentio kion ajn alian. Amareco tute ne enestas. La biero estas evidente tre interesa – malpeza kaj refreŝiga. Ĝi estas tute nekutima, do se vi havus okazon provi ĝin, certe indas, tamen evidente ŝato aŭ malŝato al tiaspecaj bieroj estas tre persona afero.

Nomo Kwas Delta
Stilo Berliner Schwarze / Berlina Nigra
Lando Pollando
Bierfarejo Pinta www fb
Alkoholenhavo 3,0% volumene
Ekstrakto 9,0% peze
Temperaturo de servado 7 – 8°
Uzitaj maltoj horodeaj kaj tritikaj Weyermann®: pilzena, tritika hela; koloriga malta ekstrakto Weyermann® Sinamar®
Uzitaj lupoloj Hallertauer Mittelfrüh (DE), Saaz (CZ)
Uzitaj gistoj Safale US-05
Aldonaĵoj bakterioj Lactobacillus Plantarum
IBU 15

Ĉu plaĉas al vi, kiel mi blogas pri bieroj? Aĉetu bieron por mi! :)

Torfe fumigita | P.I.S. & love (Birbant)

P.I.S. & love el metieja bierfarejo Birbant estas nova tre interesa sperto. Ĝi estas biero en la sitlo peated imperial stout, do imperia stout fumigita per torfo. Plie ĉi tiu biero estas specifa ankaŭ pro multeco de ekstrakto (24,5%) kaj alkohola forteco (10,5%). El trionlitra botelo kun interesa, leĝera desegnaĵo alvenas nigra, klara kaj netravidebla likvaĵo. Samtempe kreiĝas buruna kaj por tiu stilo sufiĉe longrestanta ŝaŭmo. En aromo avanas fumo, kafo kaj ĉokolado. En la gusto same kun aldono de delikata dolĉo kaj fina amareco. Rimarkindas tamen ke ĉiuj tiuj aromoj kaj gustoj ne estas simplaj. Ili estas tre forte senteblaj. La biero estas densa, gustoplena kaj iom kvazaŭ viskio gluiĝanta al la glaso. Certe ĉi tio ne estas biero por ĉiutaga trinkado. Ĝi estas iom ekstrema kaj per tio ankaŭ tre interesa. Laŭ mi ĝi estas bongustoa kaj mi pensas, ke por ĉiuj almenaŭ provinda.

Nomo P.I.S. & love
Stilo torfa imperia stout / peated imperial stout
Lando Pollando
Bierfarejo Birbant www fb
Alkoholenhavo 10,5% volumene
Ekstrakto 24,5% peze
Temperaturo de servado 10 – 14°
Uzitaj maltoj Pale Ale, viskia, ĉokolada, melanoidynowy, karamela, brulita horodeo, sukero
Uzitaj lupoloj Magnum
Uzitaj gistoj S-04
Aldonaĵoj
IBU 78

Ĉu plaĉas al vi, kiel mi blogas pri bieroj? Aĉetu bieron por mi! :)

Festa biero | Jurajskie Świąteczne (Na Jurze)

Jen por la nova jaro – plia festa biero: Jurajskie Świąteczne de bierfarejo Na Jurze. Tuj ravas tre ĉarma etikedo, kiu similas al kristnaska pulovero. Verŝinte en la glason ni vidas malhelbrunan malklaran bieron kun mezalta ŝaŭmo kiu ne restis tre longe. Enmetinte nazon en la glason ravas la aromo de kakao. En gusto senteblas miela dolĉeco kaj tre delikata amareco. Finfe senteblas pikado de ĉili-kapsiketo. Tre agrabla biero por vintraj vesperoj!

Nomo Jurajskie Świąteczne
Stilo malhela festa
Lando Pollando
Bierfarejo Na Jurze www fb
Alkoholenhavo 5,6% volumene
Ekstrakto 16,5% peze
Temperaturo de servado 9 – 11°
Uzitaj maltoj horodea hela, ĉokolada
Uzitaj lupoloj mankas informo
Uzitaj gistoj S-04
Aldonaĵoj kakao, fagopira mielo, ĉokolada aromo, ĉili-kapsiketo
IBU mankas informo

Ĉu plaĉas al vi, kiel mi blogas pri bieroj? Aĉetu bieron por mi! :)

Cumowe (Spółdzielczy)

Jen nova bierfarejo en mia kolekto: Browar Spółdzielczy (Kooperativa Bierfarejo) el Puck. Ĝi estas neprofitcela kooperativo, kiu tiel laborigas neplenlertulojn kaj partoprenintojn de okup-terapio. Ĉiuj iliaj bieroj portas nomojn venantajn de maristaj nodoj. Same estas pri ĉiu avena stout – Cumowe. La biero mem ne estas aparte impresa. Ĝi havas belan nigran koloron, kiu nur ĉerande aspektas iom pli malhelrubene. Ŝaumo estis bruna kaj ĉeestis tre mallonge. En aromo mi ne sukcesis multon eltrovi. Avenecon mi ne sentis. Aromo estas iometete kafeca aŭ amarĉokolada, sed nur se oni vere volus iun aromon eltrovi. En gusto iom acida, iom amara. Ĝenerale enorda, sed tute ne elstara. Tamen la ideo de la bierfarejo estas interesa, do mi plu provos.

Nomo Cumowe
Stilo avena Stout (Oatmeal Stout)
Lando Pollando
Bierfarejo Spółdzielczy www fb
Alkoholenhavo 5,5% volumene
Ekstrakto 14,0% peze
Temperaturo de servado 10 – 13°
Uzitaj maltoj Pale ale, avenaj flokoj, horodeaj flokoj, brulita tritiko, Carafa III Special, karamela 400, Aroma
Uzitaj lupoloj Iunga
Uzitaj gistoj Safale S-04
Aldonaĵoj
IBU 30

Ĉu plaĉas al vi, kiel mi blogas pri bieroj? Aĉetu bieron por mi! :)

Świąteczne (Kormoran)

Estas tradicio ke decembre aperas sezonaj “festaj” (kristnaskaj) bieroj kun spicaĵoj similaj al spicukuko. Ne alia estas ankaŭ ĉi-jare, do jen la unua provo. La biero de bierfarejo Kormoran nomiĝas simple Świąteczne (festa) kaj kostis 6,20 PLN (1,44€). La koloro de la biero estas preskaŭ nigra kun ioma malĉerizeco en la subo de la glaso. Ŝaŭmo aperis ne tre alta kaj malaperis multe pli rapide ol mi kapablas foti. En aromo nesurpirize avanas spicaĵoj (ĉefe kariofilo) kaj dolĉo de karamelo. Gusto simple ripetas la aromon kaj senteblas iomete io kvazaŭ metaleco.

Ĉi tio ne estas la unua festa biero, kiun mi trinkas kaj ĝi ne ŝajnas al mi iel aparte elstara. Ĝi ne malbonas, sed mi pensas, ke eblas trovi pli bonan festan bieron. Cetere, trinkante ĝin mi konstante pensis, ke ĝi (krom spiceco) tre similas al Fortuna Czarne – siatempe mia Arkonesa biero. Iam mi devas ankaŭ ĝin recenzi. Nun mi deziras al vi agrablajn festo-tagojn! :)

Nomo Świąteczne
Stilo malhela festa
Lando Pollando
Bierfarejo Kormoran www fb
Alkoholenhavo 6,1% volumene
Ekstrakto 16,5% peze
Temperaturo de servado 9 – 11°
Uzitaj maltoj hordej hela kaj malhelaj
Uzitaj lupoloj mankas informo
Uzitaj gistoj mankas informo
Aldonaĵoj kariofilo, cinamo, ŝelo de oranĝo, zingibro, pimento, kardamomo, naturaj aromoj
IBU mankas informo

Ĉu plaĉas al vi, kiel mi blogas pri bieroj? Aĉetu bieron por mi! :)

Podróże Kormorana – American IPA (Kormoran)

Denova usona India Pale Ale (AIPA) – verŝajne vi rimarkis, ke tiustilajn bierojn mi provas relative ofte. Nu, ili simple vere indas pro multo da aromo kaj multo da gusto. Kaj kiel estas pri tiu ĉi – American IPA el bierfarejo Kormoran el Olsztyn? Tute bone! Aromo citrusa, do tute korekta. Gusto evidente amara, bone kontraŭita per iomo da dolĉo. Tute agrabla. La biero en glaso havas malhelan sukcenan koloron kaj estas unuece malklara. Ŝaŭmo unue tute bonis, sed poste rapide malaperins, ne lasante multon da spuroj. Fakte dum miaj gustumadoj sufiĉe ofte la ŝaŭmo ne aparte elstaras, dum en aliaj recenzoj de la sama biero mi legas ke ĝi bonas. Verŝajne estas pro tio ke mi kutime uzas glason kiu tre bonas por gustumado (bonege koncentrigas aromon), sed ne nepre bonas por ŝaŭmo. Eble mi devas provi lavi la glason per malvarma akvo tuj antaŭ gustumado – tio devus helpi. Teorie mi povus ankaŭ uzi alian glason, sed por mi pli gravas aromo ol ŝaŭmo, do mi restos ĉe ĉi tiu ;)

Pri eksteraĵoj – etikedo tute bona, kongrua kun la serio Podróże Kormorana (Vojaĝoj de Kormoran) kun sufiĉe multaj informoj en la malantaŭo kaj iu teda historieto. Kronfermilo speciala por ĉi tiu limigita serio – limigita, ĉar krom produkti amasajn bierojn, Kormoran kadre de siaj vojaĝoj produktas ankaŭ malgrandskalajn bierojn en diversaj niĉaj stiloj. Fine ni alvenas la prezo kaj ĉi tio estas iom malagrabla punkto – 8,29 PLN (1,97€). Ĉi tiu prezo estas sama, kiel samstilaj metiejaj, pli bonaj bieroj. De iom pli granda bierfarejo kiel Kormoran oni povus atendi prezon pli facile digesteblan. Do, kvankam la biero bonas, eĉ tre bonas, en tiu prezkategorio ĝi havas pli elstarajn konkurantojn.

Nomo Podróże Kormorana – American IPA
Stilo American India Pale Ale (AIPA)
Lando Pollando
Bierfarejo Kormoran www fb
Alkoholenhavo 6,0% volumene
Ekstrakto 16,0% peze
Temperaturo de servado 9 – 10°
Uzitaj maltoj herdeaj, tritika
Uzitaj lupoloj usonaj: Cascade, Chinook, Citra, Centennial, Mosaic
Uzitaj gistoj mankas informo
Aldonaĵoj
IBU 85 laŭ la retpaĝo, sed tio tutcerte ne veras, ĝi ne tiom amaras

Ĉu plaĉas al vi, kiel mi blogas pri bieroj? Aĉetu bieron por mi! :)

Apetyt na życie (Pinta)

Apetyt na życie estas vortludo, kiu signifas aptiton je vivo, sed povas signifi ankaŭ apetiton sur sekalo. Evidentas do, ke temas pri sekala biero. La stilo estas germana Roggenbier. Ĉi-foje klasika versio, ĉar aŭtoran interpreton el la sama birfarejo (Żytorillo de Pinta) mi jam prezentis antaŭe.

Verŝita en la glason la biero prezentiĝas tre bele. Ĝi estas kuprakolora kaj malklara, havas altan densan ŝaŭmon. Aromo estas grena kaj gista. La gusto estas ĉefe milde acida, malte grena kaj iomete amara en la fino. La biero estas densa, iom gluiĝema kun klare sentebla gasenhavo. Mi persone ne estas aparta ŝatanto de tritikaj kaj sekalaj bieroj, sed tre interesas fari tian provon de tempo al tempo. La biero kostis 7,59 zlotojn (1,79€) en loka vendejo kaj estis tute ĝuinda.

Nomo Apetyt na życie
Stilo Roggenbier
Lando Pollando
Bierfarejo Pinta www fb
Alkoholenhavo 5,0% volumene
Ekstrakto 13,1% peze
Temperaturo de servado 9 – 11°
Uzitaj maltoj Weyermann®: pilzena, sekala, viena, karamela sekala Cararye®, brulita Carafa® Special tipo I
Uzitaj lupoloj germanaj Tettnanger kaj Spalt Select
Uzitaj gistoj WB-06
Aldonaĵoj
IBU 18

Ĉu plaĉas al vi, kiel mi blogas pri bieroj? Aĉetu bieron por mi! :)

Burgundowy Łowca (Podgórz)

Jen mia dua konfronto kun la stilo Barley Wine. Unuan tian bieron (Mr. Hard de Pracownia Piwa) mi provis en la Varsovia Bierfestivalo. Ĉi tiun mi aĉetis samloke, sed en duonlitra botelo por preni hejmen. Ĝi kostis 19 zlotoj (4,46€) do jam vere multe eĉ por metieja biero. La biero nomiĝas Burgundowy Łowca kaj estas produktita de la metieja bierfarejo Podgórz el Rabka Zdrój. Łowca estas ĉasisto en la pola, sed ĝi ankaŭ similas al montarandialekte elparolata ŝafo. Ŝafo estas simbolo de ĉi tiu bierfarejo kaj multaj ĝiaj bieroj havas ŝaftemajn nomojn. Ekzistas interalie biero Łowca kiu estas klasika Barley Wine kaj ĉi tiu kiun mi gustumas – Burgundowy Łowca. Kial Burgundowy? Ĉar Burgundowy signifas Burgonja (el Burgonjo, vinregiono en francio) kaj ĉi tiu biero maturiĝis en bareloj post burgonja vino.

Unue pri la aspekto. La botelo havas desegnaĵon kiun mi ne vere komprenas. Estas tie ĉasisto, sed kiu estas ligo kun Burgonjo? Aliflanke estas sufiĉe kompletaj informoj pri la biero mem, do enordas. Verŝinte en la glason ŝaŭmo apenaŭ aperis, kio ne estas surpiza en tiom forta biero. La koloro similas al malforta teo aŭ al sukceno, se oni verŝas iom pli. Ĝi estas malklara, ĉar ja nefiltrita (kaj ankaŭ ne psteŭrizita, pro kio la limdato por triniki ĝin estis tre kurta). Aromo unue estas tre vineca, poste senteblas odoro de alkoholo, eble simila al ĉeriza brando? La aromo estas ankaŭ iom malta kaj dolĉa, sed ĝenerae malpli riĉa ol en Mr. Hard. Gusto estas ĉefe dolĉa. Poste ne venas amareco, kiel en la biero de Pracownia Piwa – verŝajne pro tio, ke por ĉi tiu oni uzis nur britajn lupolojn fuggles kaj EKG, dum en Mr. Hard estis ankaŭ unu usona. Burgondowy Łowca estas biero densa kun malmulta gasenhavo. Ĝenerale ĝi tute bonas, sed mi pensas, ke malpli ol la unua Barley Wine, kiun mi provis. Eble estis pro tio, ke tiam estis la unua provo de stilo nova por mi? Mi evidente devas reprovi por kontroli ;)

Nomo Burgundowy Łowca
Stilo Barley Wine
Lando Pollando
Bierfarejo Podgórz fb
Alkoholenhavo 10,0% volumene
Ekstrakto 24,0% peze
Temperaturo de servado 10 – 13°
Uzitaj maltoj hordea
Uzitaj lupoloj fuggles, EKG
Uzitaj gistoj FM12
Aldonaĵoj
IBU mankas informo

Ĉu plaĉas al vi, kiel mi blogas pri bieroj? Aĉetu bieron por mi! :)