Restoracia bierfarejo Labirratorio

Survoje de Pesaro al Romo, kune kun kelkaj amikoj, kiuj survojis al flughaveno ni havis kelkhoran halton en urbeto Falconara Marittima. Tie ni vizitis restoracian bierfarejon Labirratorio. Ĉi tiu mojosa nomo evidente estas kunmetaĵo de italaj vortoj laboratorio kaj birra (biero). Kvankam la restoracio troviĝas en distanco de ĉirkaŭ 10 minutoj piede de la stacidomo, ĝia ĉirkaŭaĵo tute ne estas drinkej-restoracia, do evidente malfacilas trafi al ĝi hazarde. Ne mirigas do, ke priservanta nin la ĉefa bierfaristo mem, Simone Santarelli, tuje interesiĝis pri tio kiel kaj kial ni estas ĉi tie.

La restoracio estas mezgranda kaj havas modernan, minimumisman aspekton. Eblas sidi ankaŭ ekstere kaj uzante bonajn veterkondiĉojn, ni elektis ĝuste tiun eblecon. La drinkejo ofertas 4 memfaritajn bierojn el kiuj mi provis du: CAMPANIA24 kaj SIMPLYRED. La aliaj du estas tritika CRUDALE kaj belgstila hela MARILYN. La bieroj kostis 5 eŭrojn por dunlitro kaj 3,50€ por trionlitra glaso. El nealkoholaj trinkaĵoj apartan atenton meritas bongusta ruĝkolora metieja kolao el bierfarejo Baladin. Por manĝi Labirratorio proponas klasikan elekton de diversaj italaj manĝoj (picoj, pastaĵoj, piadinoj, desertoj).

CAMPANIA24 estas biero en la stilo de brita IPA kun aldono de pomo kaj bergamoto. Ĉi tiujn aldonaĵojn verdire mi ne vere sentis, sed eble kaŭzis tion trinkado ekstere, kiu malfaciligas ĝustan perceptadon de aromoj. La biero havas sukcenan koloron, estas malklara kaj travidebla. La ŝaŭmo estis mezalta, firma kaj lasanta belajn suporojn sur la glaso. En la gusto avanis nelonga sed sufiĉe forta amareco. Gasenhavo estis meza, tre taŭga por la biero. Leginte pri ĉi tiu biero en la menuo mi eble atendis ion pli pro la aldonaĵoj, sed eble mi devus provi la bieron ene.

SIMPLYRED laŭ la stilo estas irlanda ruĝa elo. Mi ne vere sciis kion atendi de ĝi, ĉar ŝajne tiustilan bieron mi ankoraŭ ne trinkis. Do, unue rimarkindas, ke laŭ koloro ĝi ne estas ruĝa, kiel oni povus pensi laŭ la nomo (ja tiuj stilnomoj foje estas iom misgvidaj), sed bruna, eĉ malhelbruna. Ŝaŭmo mezaltis kaj ne restis tre longe, sed ĝi lasis surfacan tavolon kaj spurojn surglase. En la aromo denove mi ne sentis multon, de vere, verŝajne kulpis gustumado ekstere. La gusto estis forte maltbazita kaj agrable milda – ne tro dolĉa sed ankaŭ tute ne amara. Aldonante al tio meznivelan gasenhavon oni ricevas vere tre agrablan kaj faciltrinkeblan bieron.

Resumante, Labirratorio estas vere rekomendinda loko. Se vi iam havus iun paŭzon en Falconara Marittima certe ne iru al la ĉefplaco (ni spertis tre malbonan priservon en tiea kafejo), sed direktiĝu tuj al Labirratorio por ne nur trinki bonan bieron, sed ankaŭ bone manĝi.

CAMPANIA24

Nomo CAMPANIA24
Stilo IPA
Lando Italio
Bierfarejo Labirratorio www fb
Alkoholenhavo 5,5% volumene
Ekstrakto mankas informo
Temperaturo de servado 10 – 13°
Uzitaj maltoj horodeaj
Uzitaj lupoloj britaj
Uzitaj gistoj mankas informo
Aldonaĵoj bergamoto, pomo
IBU mankas informo

SIMPLYRED

Nomo SIMPLYRED
Stilo irlandstila ruĝa elo (Irish Red Ale)
Lando Italio
Bierfarejo Labirratorio www fb
Alkoholenhavo 5,5% volumene
Ekstrakto mankas informo
Temperaturo de servado 9 – 10°
Uzitaj maltoj horodeaj kaj tritikaj
Uzitaj lupoloj mankas informo
Uzitaj gistoj mankas informo
Aldonaĵoj
IBU mankas informo

Ĉu plaĉas al vi, kiel mi blogas pri bieroj? Aĉetu bieron por mi! :)

Advertisements

Ĉe la plaĝo en Pesaro | American IPA (Canediguerra)

American IPA el bierfarejo Canediguerra (5,50 eŭroj en vendejo) estas la sekva biero trinkita dum la 40-a Internacia Junulara Festivalo en Pesaro. Ŝajnas ke ĉi tiu bierfarejo ne kutimas doni nomojn al siaj bieroj, sed simple nomas ilin laŭ la stiloj. Ĉiuj etikedoj de la bierfarejo havas similan karakteron – ili estas estetikaj kaj minimumismaj, kun kun ne multon diranta tamen bela grafikaĵo.

La biero mem havas pajlan koloron, ĝi estas klara kaj travidebla. Ŝaŭmo unue mezalta rapide reduktiĝis al etera surfaca tavolo kaj tiel restis ĝis fino de gustumado. Aromo estas citrusa, ĉefe oranĝa. En gusto unuan rolon ludas forta, sed ne restanta lupola amareco.

Post Madiba jen ĉi tiu estas la skeva biero tre bongusta kaj tute korekta en sia stilo, tamen iom unudimensia. En Madiba ĉefrolis brulitaj maltoj kaj ĉi tie evidente usonaj lupoloj. Tiel do mi havis okazon trinki bongustan American IPA (eble ili ne donas nomojn, ĉar tian bieron nenio pli bone priskribus ol la bierstilo mem?) en tre agrablaj cirkonstancoj de bela, sunoplena tagmezo sur la plaĝo en Pesaro.

Nomo American IPA
Stilo American IPA
Lando Italio
Bierfarejo Canediguerra www fb
Alkoholenhavo 6,7% volumene
Ekstrakto mankas informo
Temperaturo de servado 10 – 13°
Uzitaj maltoj mankas informo
Uzitaj lupoloj mankas informo
Uzitaj gistoj mankas informo
Aldonaĵoj
IBU mankas informo

Ĉu plaĉas al vi, kiel mi blogas pri bieroj? Aĉetu bieron por mi! :)

Kio estas IBU? | imperium atakuje (Pinta)

Ĉi tiu sperto devus esti ŝoka. Mi trinkas bieron kiu amaras je 81 aŭ 87 IBU. Kio estas IBU? IBU, do International Bittering Units (Internaciaj Amarec-Unuoj) estas mezurilo de bieramareco. Kutime trinkataj en Eŭropo konzernaj lager-bieroj havas amarecon de proksimume 16-24 IBU. Ekzemploj? Żubr havas 16 IBU, Perła Export (mi memorigas, ke export sugestas plian kvanton da lupolo, do plian amarecon) – 17, Carlsberg kaj Lech – 18, Tyskie kaj Heineken – 20 kaj finfine, laŭ multaj opiniata “amara” Żywiec – 24 IBU. Tiuj estas kvantoj ege malaltaj, taŭgaj por lager bieroj (devus havi inter 16 kaj 25 IBU), sed eĉ ne atingantaj normojn por Pilsner, kiu devus havi inter 25 kaj 50 IBU. Por trovi veran amarecon oni evidente devas serĉi inter metiejaj bieroj.

La biero, kiun mi nun trinkas – imperium atakuje (imperio atakas) de bierfarejo Pinta – laŭetikede havas 81 IBU kaj laŭteste eĉ 87 IBU, do ĝi devus esti ekstereme amara. Ja ĝi estas Imperial India Pale Ale, do IPA kun ankoraŭ pli da lupolo. Sed fakte por mi ĉi tiu biero ne vere estas tiomege amara. Aŭ pli precize, ĝi estas amara, sed tiu amaraeco tute ne ĝenas kaj tio iom surprizas min, ĉar siatempe mi ne bone toleris tre amarajn bierojn. Do, aŭ mia toleremo ja amareco signife ŝanĝiĝis pro miaj lastatempaj biereksperimentoj aŭ ĉi tiu biero estas tiom bone balancita. Fakte, ja tiuj IBU-gradoj ne estas ĉio se temas pri senteblo de amareco – tre gravas ankaŭ rilato inter IBU kaj ekstrakto, sed ja ankaŭ en tiu eco imperium atakuje estas sufiĉe eksterma (kvankam ne plej eksterema el la polaj bieroj).

Ĵus venis Natalia, provis ĝin kaj ankaŭ ŝi ne sentas tiun amarecon kiel ĝenan, sed opinias la bieron bongusta, do ŝajnas ke ĝi vere estas mirinde bone balancia. Pri la cetero kurte. Ŝaŭmo ne multis ĉe mi, sed mi ne aparte zorgis. Koloro sukcena, klara. Aromo evidente fortas, ĉar ja estas multego da lupolo. Ĝi kostis 9,29 PLN (2,20€) en vendejo, do ja multe, sed tute indis. Fakte mi eĉ bedaŭras, ke jam la vendejo fermitas kaj mi ne povas iri aĉeti plian. Impreium atakuje de Pinta estas vere bonega plena gusto kun perfekte balancita amareco. Simple tiu biero nepre provendas.

Nomo imperium atakuje
Stilo Imperial India Pale Ale (Imperial IPA)
Lando Pollando
Bierfarejo Pinta www fb
Alkoholenhavo 7,8% volumene
Ekstrakto 19,1% peze
Temperaturo de servado 11 – 12°
Uzitaj maltoj Weyermann®: pale ale, hordea enzimaktiva, melanoidina, Carared®, Carapils®
Uzitaj lupoloj usonaj: Zeus/Columbus, Chinook, Centennial, Citra®, Cascade, Palisade®
Uzitaj gistoj Safale US-05
Aldonaĵoj
IBU 81-87

Ĉu plaĉas al vi, kiel mi blogas pri bieroj? Aĉetu bieron por mi! :)

Podróże Kormorana – American IPA (Kormoran)

Denova usona India Pale Ale (AIPA) – verŝajne vi rimarkis, ke tiustilajn bierojn mi provas relative ofte. Nu, ili simple vere indas pro multo da aromo kaj multo da gusto. Kaj kiel estas pri tiu ĉi – American IPA el bierfarejo Kormoran el Olsztyn? Tute bone! Aromo citrusa, do tute korekta. Gusto evidente amara, bone kontraŭita per iomo da dolĉo. Tute agrabla. La biero en glaso havas malhelan sukcenan koloron kaj estas unuece malklara. Ŝaŭmo unue tute bonis, sed poste rapide malaperins, ne lasante multon da spuroj. Fakte dum miaj gustumadoj sufiĉe ofte la ŝaŭmo ne aparte elstaras, dum en aliaj recenzoj de la sama biero mi legas ke ĝi bonas. Verŝajne estas pro tio ke mi kutime uzas glason kiu tre bonas por gustumado (bonege koncentrigas aromon), sed ne nepre bonas por ŝaŭmo. Eble mi devas provi lavi la glason per malvarma akvo tuj antaŭ gustumado – tio devus helpi. Teorie mi povus ankaŭ uzi alian glason, sed por mi pli gravas aromo ol ŝaŭmo, do mi restos ĉe ĉi tiu ;)

Pri eksteraĵoj – etikedo tute bona, kongrua kun la serio Podróże Kormorana (Vojaĝoj de Kormoran) kun sufiĉe multaj informoj en la malantaŭo kaj iu teda historieto. Kronfermilo speciala por ĉi tiu limigita serio – limigita, ĉar krom produkti amasajn bierojn, Kormoran kadre de siaj vojaĝoj produktas ankaŭ malgrandskalajn bierojn en diversaj niĉaj stiloj. Fine ni alvenas la prezo kaj ĉi tio estas iom malagrabla punkto – 8,29 PLN (1,97€). Ĉi tiu prezo estas sama, kiel samstilaj metiejaj, pli bonaj bieroj. De iom pli granda bierfarejo kiel Kormoran oni povus atendi prezon pli facile digesteblan. Do, kvankam la biero bonas, eĉ tre bonas, en tiu prezkategorio ĝi havas pli elstarajn konkurantojn.

Nomo Podróże Kormorana – American IPA
Stilo American India Pale Ale (AIPA)
Lando Pollando
Bierfarejo Kormoran www fb
Alkoholenhavo 6,0% volumene
Ekstrakto 16,0% peze
Temperaturo de servado 9 – 10°
Uzitaj maltoj herdeaj, tritika
Uzitaj lupoloj usonaj: Cascade, Chinook, Citra, Centennial, Mosaic
Uzitaj gistoj mankas informo
Aldonaĵoj
IBU 85 laŭ la retpaĝo, sed tio tutcerte ne veras, ĝi ne tiom amaras

Ĉu plaĉas al vi, kiel mi blogas pri bieroj? Aĉetu bieron por mi! :)

ŻytoRillo (Pinta)

ŻytoRillo – la nomo estas kombinaĵo de la vorto żyto, kio en la pola signifas sekalon kun Amarillo, kiu estas nomo de usona lupolo. Tio jam diras sufiĉe multon pri la biero. Ĝi estas aŭtora variaĵo de la klasika sekala bierstilo – Roggenbier (hela, plena kaj malmulte lupolita), sed kun pli da maltoj (ankaŭ brulita) kaj multego da usona lupolo Amarillo.

Post verŝo en la glason tuje rimarkeblas vere elstara, etera, helbruna ŝauma ĉapo, kiu eltenas tre longe kaj dum drinkado lasas multajn spurojn. La biero estas tre malhelbruna, preskaŭ nigra. En aromo senteblas evidente citrusoj, sed ankaŭ bruliteco kaj iom da ĉokolado. ŻytoRillo estas densa kaj fortgusta kun longe restanta amareco, ne vere kontraŭita per alia gusto (povus esti ekzemple iom da citrusa dolĉo). Ĝi ne estas tute bone balancita, sed tamen tute bone gustas kaj agrable trinkeblas. Mi ie perdis kvitancon de la vendejo, sed miamore ĝi kostias 9 aŭ 10 zlotojn. Mi pensas, ke iam mi ankoraŭ retrinkos.

Nomo ŻytoRillo
Stilo Black Rye IPA (nigra sekala IPA)
Lando Pollando
Bierfarejo Pinta www fb
Alkoholenhavo 5,3% volumene
Ekstrakto 14,0% peze
Temperaturo de servado 9 – 11°
Uzitaj maltoj Weyermann®: pale ale, sekala, munketna tipo II, brulita Carafa® Special typ II
Uzitaj lupoloj Amarillo (usona)
Uzitaj gistoj Safale Fermentis S-04
Aldonaĵoj
IBU 68

Ĉu plaĉas al vi, kiel mi blogas pri bieroj? Aĉetu bieron por mi! :)

Dżin (Kraftwerk)

Aĉetitaĵo de la Varsovia Bierfestivalo – biero Dżin (ĝino) de la kontrakt abierfarejo Kraftwerk el Mikołów en Silezio, produktita en Wąsocz. Silezia karaktero tuj rimarkeblas en la tute bona etikedo. Stilo de Dzin estas India Pale Ale (IPA) kun Earl Grey kaj hibisko.

Verŝante en la glason mia unua penso estis, ke ĝi estas surprize multe gasenhava por ĉi tiu stilo, tamen trinkante tio ne ŝajnis ĝeni. Ŝaŭmo aperis rapide kaj eĉ pli rapide malaperis, lasante tamenn spurojn sur la vitro. Kiel atendite, la biero havas koloron de ne tre forta teo. Englase ĝi ŝajnas esti gluiĝema, sed enbuŝe tio ne multe senteblas.

Laŭetikeda Earl Grey troveblas nur iome en la aromo kaj eĉ tio eble ĉefe pro la memsugesto. Hibiskon mi ne sentis entute. Enestas tamen iom da malta, katamela aromo kaj iom da flora. La biero havas klaran, sed ne tre fortan amaran karakteron. Eble se ĝi estus unu el la unuaj IPA-bieroj, kiujn mi trinkus, mi estus verŝajne pli impresita. Tamen trinkine jam multajn tiajn ĝi ne aparte suirpizas, kvankam tute korektas. Kostis ne ege mule, ĉar nur 10 zlotojn en la festivalo kontraŭ duonlitra botelo. Sekvafoje havante tiom grandan elekton mi prefere prenu ion alian.

Nomo Dżin
Stilo India Pale Ale (IPA)
Lando Pollando
Bierfarejo Kraftwerk www fb
Alkoholenhavo 5,3% volumene
Ekstrakto 14,0% peze
Temperaturo de servado 10 – 13°
Uzitaj maltoj hordeaj kaj tritikaj
Uzitaj lupoloj Summit, Simco, Cascade
Uzitaj gistoj US-05
Aldonaĵoj teo Earl Grey, blanka teo, hibisko
IBU mankas informo

Ĉu plaĉas al vi, kiel mi blogas pri bieroj? Aĉetu bieron por mi! :)

Behemoth Profanum (Perun)

Ŝajne iĝis moda ke diversaj rokaj aŭ metalaj bandoj preparas sianomajn bierojn. Same estas en Pollando. Metala grupo Behemoth (jen ilia muziko: BEHEMOTH – Blow Your Trumpets Gabriel) havas eĉ tri tiajn bierojn: helan belgan IPA Sacrum, nigran IPA Profanum kaj usonan sukcenan elon Heretyk. Nun mi provas la duan.

Behemoth Profanum estis produktita de bierfarejo Perun kaj do ĝi kompreneble havas tre bonan etikedon – taŭgan por la nomo. La biero, kiel atendite estas komplete nigra, neniom travidebla. Ŝaŭmo unue altis kaj belis, sed rapide malaperis. Bedaŭrinde en aromo kaj gusto la biero ne plu tiom “nigras”. Senteblas ĉefe rezino kaj iom da fruktoj. Malpli multas tipe malhelbieraj: brulita kafo aŭ amara ĉokolado. Komence ĝi acidas kaj poste lasas amarecon. Mezgasa facile trinkeblas. Profanum estas interesa kaj agrabla, sed ne vere tion mi atendis de nigra biero de Behemoth kaj eĉ pli ne de nigra IPA – ĝis ĉi tiu stilo mankas al ĝi forto en la gusto. Eble oni pli bone kategoriigu ĝin kiel usonan stout – tiam ĝi tute bonas.

Nomo Behemoth Profanum
Stilo Black IPA / Cascadian Dark Ale / usona Stout
Lando Pollando
Bierfarejo Perun www fb
Alkoholenhavo 5,6% volumene
Ekstrakto 13,0% peze
Temperaturo de servado 10 – 13°
Uzitaj maltoj hordeaj, tritika
Uzitaj lupoloj lupoloj
Uzitaj gistoj mankas informo
Aldonaĵoj brulita hordeo
IBU mankas informo

Ĉu plaĉas al vi, kiel mi blogas pri bieroj? Aĉetu bieron por mi! :)

Atak chmielu (Pinta)

Venas tempo por klasikaĵo – atak chmielu (lupola atako) de bierfarejo Pinta. Pri la stilo – usona India Pale Ale mi jam skribis ĉe Po Godzinach AIPA (Amber) do mi tuj iru al la biero. Ĝi estas mejloŝtono de la biera revolucio en Polland – produktata ekde 2011 kaj tiama biero de la jaro – en la pola merkato estis la unua tiom aroma kaj tiom amara.

La biero estas klara kaj kuprakolora. Eble en miaj fotoj la ŝaŭmo ne elstaras, sed kutime ĝi havas tre belan kaj stabilan ŝaŭmon. La aromo estas tre lupola, citrusa, eble iom flora. La biero estas evidente amara, sed laŭ mi tiu amareco estas tute agrabla, tre bone bilancita per dolĉa citruas aromo. Ĝi estas ankaŭ tre refreŝiga kaj surprize faciltrinkebla. Laŭ diversaj opinioj ĉi tiu biero ne havas tute stabilan kvaliton, sed mi ĝis nun ne trafis malbonan ekzempleron. En loka vendejo kostis 7,59 PLN (1,80€). Se vi ie vidos ĝin, certe provindas, ĉar bongustas kaj ja estas birrevolucia klaksikaĵo.

Nomo atak chmielu
Stilo American India Pale Ale (AIPA)
Lando Pollando
Bierfarejo Pinta www fb
Alkoholenhavo 6,15,0% volumene
Ekstrakto 15,1% peze
Temperaturo de servado 9 – 10°
Uzitaj maltoj pale ale, melanoidina, Carahell®, Carapils®
Uzitaj lupoloj Citra, Simcoe, Cascade, Amarillo
Uzitaj gistoj Safale US-05
Aldonaĵoj
IBU 58

Ĉu plaĉas al vi, kiel mi blogas pri bieroj? Aĉetu bieron por mi! :)

Kulawy Ork (Chmielogród)

Hodiaŭ venas tempo por la nigra versio de IPA-biero, nomata ankaŭ Cascadian Dark Ale. En biera mondo estas disputo pri tio kiel nomi tiun stilon, sed pri tio eble alifoje. Nun pri la reprezentanto de ĉi tiu stilo – Kulawy Ork (lama ogro) el gdanska kontrakta bierfarejo Chmielogród. Ili produktas tiun bieron duloke. En unu loko oni enbareligas ĝin kaj vendas en gdanskaj (aŭ proksimaj) drinkejoj, dum por enboteligo kaj vendado en aliaj regionoj de Pollando oni produktas ĝin en bierfarejo Witnica. Mi trinkis ĝin en varsovia manĝejo Jamniczek (veganaj hot-dogoj), do kompreneble mi ricevis la botelan varianton de Witnica. Sur la botelo estas tre bona etikedo kun la nomo, stilo kaj bildo de tiu ĉarma lama estaĵo. En la malantaŭa etikedo troviĝas sufiĉe multaj informoj pri la biero mem.

Kulawy Ork estas biero kun elstara bruna, etera ŝaŭmo. En la glaso bone videblas flugantaj gistoj (vidu la plej dekstran bildon), kio ne estas eraro (la produktanto aparte avertas pri tio en la etikedo), ĉar la biero estas nefiltrita. La aromo estas evidente lupola kun iom da brulitaj maltoj. Mi ne vere sukcesis bone pritaksi detalojn de la aromo, ĉar mi trinkis la bieron ekstere kaj en maltaŭga glaso. En gusto, amareco estas meza (por tiu stilo kompreneble), bone balancita. La bieron oni trinkas tute facile – ĝi ne surgenuigas, sed tute bonas kaj oni volonte prenus la sekvan. Mi trinkis ĝin kontraŭ 9 zlotoj (2,13€), do tute bona prezo konsiderante ke estis manĝejo kaj ne vendejo. Do tutcerte mi rekomendas ambaŭ – la bieron Kulawy Ork kaj veganhotdogan manĝejon Jamniczek.

Nomo Kulawy Ork
Stilo Black IPA / Cascadian Dark Ale
Lando Pollando
Bierfarejo Chmielogród www fb
Alkoholenhavo 6,0% volumene
Ekstrakto 14,1% peze
Temperaturo de servado 10 – 13°
Uzitaj maltoj herdeaj (mankas pliaj detaloj)
Uzitaj lupoloj Columbus, Cascade, Simcoe, Centennial
Uzitaj gistoj mankas informo
Aldonaĵoj
IBU 60

PS. Pardonu fotokvaliton – ĉi-foje nur poŝtelefono.

Ĉu plaĉas al vi, kiel mi blogas pri bieroj? Aĉetu bieron por mi! :)

Po Godzinach AIPA (Amber)

AIPA estas mallongigo por American India Pale Ale – la fama stilo de la biera revolucio. Do, dekomence. Ekzistis brita bierstilo Pale Ale, do hela altfermentita biero. Britoj volis havi sian bieron ankaŭ en kolonioj, sed problemo estis, ke biero ne eltenadis la vojaĝon. Do por ke ĝi estu pli longe trinkebla oni aldonis pli da lupoloj, kiuj konservas bieron. Pro tio india en la nomo, ĉar tiu multlupola biero devis atingi Baraton. Kromefiko de pli granda kvanto de lupolo estis, ke la biero fariĝis pli aroma kaj pli amara. Tiel naskiĝis nova stilo India Pale Ale konata kiel IPA. Sekve, ĝi ricevis plurajn variaĵojn kaj unu el ili (tre populara en etbiera merkato) estas AIPA, do IPA kun usonaj lupoloj (pro tio American). Tiujn lupolojn karakterizas ĉefe fruktaj, citrusaj aromoj. Finfine do la biero en stilo AIPA devus esti relative ekstrema – aromriĉa, gustoriĉa kaj forte amara. Ĉu Po Godzinach AIPA de bierfarejo Amber estas tia? Jen la recenzo.

Valoras komeci de tio, ke Amber estas nemalgranda bierfarejo, do la bieron oni devas rigardi duflanke – en komparo kun aliaj samstilaj bieroj kaj kiel eventualan unuan konfronton kun la stilo. Do unue mi provu tiun duan aliron. Aspekto de la biero estas sufiĉe taŭga. Ĝi havas belan malhelsukcenan koloron, tamen la ŝaŭmo apenaŭ ekzistis. En aromo, kiel anoncite en etikedo, evidente senteblas citrusoj. La gusto estas ĉefe malta kun lupoldevenaj citrusoj, tamen eble iom maltro densa, konsciante ke laŭetikede estas 15% de ekstrakto. Do, ĝis ĉi tie ĉio bonas – la biero kongruas kun la stilo AIPA, sed estas iom mildigita, do ne vere komparebla kun samstilaj metiejaj bieroj, sed taŭga por unua konfronto kun la stilo. Sed venas ankoraŭ unu punkto. Amareco. Ĝi tute ne estas mildigita. Laŭ la etikedo ĝi “klare senteblas” sed fakte mi dirus ke ĝi estas restanta. Oni sentas tiun amarecon ankoraŭ longe post trinkado kaj al mi tio tute ne plaĉas. Ne ĝenus min forta amareco, sed ĝi estus bilancita per forta frukteco. Ĉi tie frukteco enestas, sed maltroa por balanci intensan kaj restantan amarecon. Resume, se vi ne ankoraŭ provis bieron en la stilo AIPA, vi konsciu ke Po Godzinach AIPA ne estas elstara ekzemplo, sed ankaŭ ne malkorekta kaj ne timiĝu de amareco – en kelkaj metiejaj samstilaj bieroj ĝi estas pli bone balancita. Se vi tamen jam provis aliajn AIPA-bierojn ĉi tiu verŝajne ne ravos vin. Kostis 5,79 PLN (~1,37€) kaj laŭ mi meritas aĉeton kaj provon, sed tro oni ne atendu. Ankaŭ, se vi havos elekton inter ĉi tiu kaj (eĉ se pli kosta) metieja AIPA, elektu la duan.

Nomo Po Godzinach AIPA
Stilo American India Pale Ale (AIPA)
Lando Pollando
Bierfarejo Amber www fb
Alkoholenhavo 5,2% volumene
Ekstrakto 15,1% peze
Temperaturo de servado 10 – 13° (tamen ĉi tiun eble indas pli malvarmigi)
Uzitaj maltoj pale ale, tritika
Uzitaj lupoloj usonaj Citra, Chinook kaj novzelanda Pacific Jade
Uzitaj gistoj mankas informo
Aldonaĵoj
IBU 65 – 75

Ĉu plaĉas al vi, kiel mi blogas pri bieroj? Aĉetu bieron por mi! :)